कोलम्बो-  श्रीलङ्कामा लगातारको भारी वर्षापछि आएको बाढी र भूस्खलनमा कम्तीमा पाँच जनाको मृत्यु भएको छ भने दुई जना बेपत्ता भएका छन् । विपद्को सबैभन्दा बढी असर चिया उत्पादनका लागि परिचित मध्य पहाडी क्षेत्रमा परेको छ । त्यस क्षेत्रमा जहाँ विद्यालयहरू बन्द गरिएका छन् र हजारौँ मानिसलाई सुरक्षित स्थानमा सारिएको छ ।

सरकारको विपद् व्यवस्थापन केन्द्रका अनुसार पछिल्ला दुई दिनदेखि परेको अविरल वर्षाले देशका विभिन्न भागमा बाढी, पहिरो र पूर्वाधारमा क्षति पु¥याएको छ । मध्य क्षेत्रका दुई घरमाथि पहिरो खस्दा पाँच जनाको मृत्यु भएको र अन्य तीन जना घाइते भएको केन्द्रका प्रवक्ता प्रदीप कोडिप्पिलीले जानकारी दिनुभयो । घटनामा दुई जना अझै बेपत्ता रहेका छन् ।

उहाँका अनुसार वर्षा र बाढीका कारण कम्तीमा १२९ घरमा क्षति पुगेको छ भने करिब दुई हजार जनालाई सुरक्षित स्थानमा स्थानान्तरण गरिएको छ । बाढीमा फसेका नागरिकको उद्धार तथा सुरक्षित स्थानमा सार्न सेना र नौसेनाका टोली परिचालन गरिएको छ ।

स्थानीय सञ्चारमाध्यमले बाढीले घरभित्रै थुनिएका नागरिकलाई सुरक्षाकर्मी र स्थानीयवासीले उद्धार गरिरहेको तथा केही क्षेत्रमा पहिरोको जोखिम अझै कायम रहेको दृश्य प्रसारण गरेका छन् । मध्य पहाडी क्षेत्रका धेरै मुख्य सडकमा चट्टान र माटो खस्नुका साथै बिजुलीका पोल ढलेपछि यातायात पनि प्रभावित भएको छ ।

यो विपद् गत नोभेम्बरमा आएको विनाशकारी चक्रवात ‘डिट्वा’ पछि आएको अर्को ठूलो प्राकृतिक प्रकोप हो । उक्त चक्रवातमा करिब ६४० जनाको मृत्यु भएको, दुई लाखभन्दा बढी नागरिक प्रभावित भएका तथा करिब चार अर्ब १० करोड अमेरिकी डलर बराबरको क्षति पुगेको सरकारी तथ्याङ्कमा उल्लेख छ । त्यसबेला पनि मध्य प्रान्त सबैभन्दा बढी प्रभावित भएको थियो र त्यहाँका सडक, रेलमार्ग तथा आवास पुनर्निर्माणको काम अझै जारी छ ।

श्रीलङ्कामा मनसुनका बेला हुने बाढी र पहिरो हरेक वर्ष दोहोरिने प्रमुख प्राकृतिक विपद्मध्ये एक मानिन्छ । विशेषगरी मध्य पहाडी क्षेत्रमा पहिरो र तल्लो भूभागमा बाढीका कारण ठूलो जनधनको क्षति हुँदै आएको छ ।