वर्तमान पदाधिकारीहरू एकलौटी रूपमा अगाडि बढेर सीमित व्यक्तिको घेराबन्दीमा संस्था कब्जा गर्ने प्रयास भएको बताउँदै पाटा नेपाल च्याप्टरका पूर्वअध्यक्ष सुमन पाण्डेले कानूनी उपचारमा थालेका छन्।
त्यस्तो घेराबन्दीबाट संस्थालाई बचाउन कानूनी उपचार शुरु गर्न लागेको पाण्डेले बताए। प्यासिफिक एसिया ट्राभल एसोसिएसनअन्तर्गतको ‘पाटा नेपाल च्याप्टर’ केही व्यक्तिको व्यक्तिगत स्वार्थ तथा अपारदर्शी क्रियाकलापका कारण अधोगतितर्फ गइरहेको उनको भनाइ छ।
‘पाटा नेपाल च्याप्टर’ को २८ चैतमा हुन लागेको साधारण सभाबाट संशोधित विधान निलम्बन गरेर सहभागिता र प्रतिस्पर्धामुलक निर्वाचन सम्पन्न गर्न पहल भइरहेका बेला १६ चैतमै निर्वाचन कार्यक्रम सार्वजनिक गरी निर्धारित व्यक्तिहरूलाई मात्र संलग्न हुने अवसर प्रदान गरिएको पाण्डेको आरोप छ।
उक्त निर्वाचन कार्यक्रम स्थगनका लागि १६ चैतमै जिल्ला प्रशासन कार्यालयमा निवेदनसमेत दर्ता गराइसकेको उनले जानकारी दिए। यस्तै, आइतबार (२० चैत) संस्थाको निर्वाचन स्थगनको माग राख्दै अदालतमा मुद्दा दायर गर्ने जानकारी पनि पाण्डेले दिए। पाण्डे जनवरी २०१३ देखि डिसेम्बर २०१७ सम्म पाँच वर्ष ‘पाटा नेपाल च्याप्टर’को अध्यक्ष थिए।