काठमाडौं- पछिल्ला केही वर्षदेखि कैलालीमा लागू औषधको कारोबार र पक्राउ पर्नेहरूको संख्यामा वृद्धि हुँदै गएको छ।
जिल्ला प्रहरी, कैलालीका अनुसार आर्थिक वर्ष ०७८-७९ देखि चालु आवको कात्तिक मसान्तसम्ममा लागू औषधका ६७१ मुद्दामा ८९९ जना पक्राउ परेका छन्।
सोही अवधिमा चरेस १ क्विन्टल ६ किलो ५१३ ग्राम, ब्राउन सुगर (खैरो हेरोइन) एक किलो ४०४ ग्राम ५८५ मिलिग्राम, नाइट्राभेट ट्याबलेट ४ हजार २०८ र स्पाम्सो ट्याबलेट १ हजार ५०९ थान फेला पारी नियन्त्रणमा लिइएको जिल्ला प्रहरीका प्रवक्ता डीएसपी कुलदीप चन्दले बताए।
आव ०७८-७९ मा २०१ मुद्दामा ३२३ जनालाई पक्राउ गरी मुद्दा चलाएको डीएसपी चन्दले बताए। उनका अनुसार आव ०७९-८० मा संख्या बढेर ३४८ मुद्दामा ४०७ जनालाई पक्राउ गरी मुद्दा चलाइएको छ।
यस्तै, चालु आवको कात्तिक मसान्तसम्ममा १२२ मुद्दामा १६९ जना पक्राउ परिसकेका छन्। आर्थिक वर्षको अन्त्यसम्ममा यो संख्यामा वृद्धि हुन सक्ने डीएसपी चन्दले बताए।
खुला सीमा, बेरोजगारी, साथीभाइको लहलहैमा लागेर लागू औषधको सेवन गर्ने र केही पैसाका लागि कारोबार गर्नेहरूको संख्या कैलालीमा बर्सेनि बढिरहेको छ। विकराल रूपमा फैलँदै गएको लागू औषधको जालो विस्तारै तराई क्षेत्रबाट पहाडतिर समेत फैलिएको डीएसपी चन्दले जानकारी दिए। ‘प्रहरी मात्रैको सहभागिताले यसलाई नियन्त्रण गर्न मुस्किल पर्नेछ,’ उनले भने।
प्रहरीले बेलाबेला विद्यालय र कलेजहरूमा लागू औषध सचेतनासम्बन्धी कार्यक्रमहरू गर्दै आएको छ। विभिन्न सामाजिक संस्थाहरूले समेत लागू औषध दुर्व्यसनका बारेमा अभियान नै चलाउनुपर्नेमा प्रहरीको जोड छ।
लागू औषधको सेवनले सामाजिक विकृतिसमेत फैलाउँदै गएकाले यसको नियन्त्रणका लागि सबैले एकजुट भएर लाग्नुपर्ने सेती प्रादेशिक अस्पतालका मेडिकल सुपरिटेन्डेन्ट डा. शेरबहादुर कमरले बताए।
उनका अनुसार लागू औषध सेवनपश्चात् एकोहोरो हुने, काममा मन नलाग्ने र शरीरका विभिन्न अंगहरूले समेत विस्तारै काम गर्न छोड्दै जाने र मानिसको मृत्युसमेत हुन्छ।
यस्तै, लागू औषध सेवन गर्न नपाए चोरी डकैती गर्ने, घरायसी समानहरू बेचबिखन गर्ने, साथीभाइहरूसँग झैझगडा गर्ने र लागू औषधका लागि जे पनि गर्न पछि नपर्ने हुँदा कहिलेकाही मृत्युका घटनाहरू सुनिन आएको उनी बताउँछन्। भन्छन्, ‘लागू औषध नियन्त्रण अहिलेको अपरिहार्य भएको छ।’
