महँगा चिल्ला गाडी
सुरक्षाकर्मीको लावालस्करसहित
सुकिलामुकिला कर्पोरेटहरूको
टोलीबाट घेरिएर
‘बा’को जात्रा निस्केको छ
लिम्पियाधुराबाट जात्रा
शुरु गर्लान् भनेको त
त्यता हेर्दै हेरेनन् ‘बा’ले
नेपालका पहाडका डाँडाकाँडामा
‘बा’को तीखो राजनीतिक
गाली गुन्जिएको छ
विकासका थोत्रा गफ
राजनीतिका दिक्क लाग्दा कुरा
आफ्नै महिमामण्डन गुन्जेका छन्
च्यातिएको भोटो
पेटभरि खान नपाएका
राजनीतिको जेलझेल नबुझेका
भारत गएर हड्डि घोटिएका
ठूलीगाडको भलले सन्तान गुमाएका
द्वन्द्वमा परिवार गुमाएका
भाषण सुन्न आएका छन्
भीड हेरी ‘बा’ खुशी भएका छन्
बडाकाजीलाई फोन गरेपछि
मने कमरेट, बडाकाजीको सातो गएको छ
आफूले बनाएको टावर नहेरेझैं गरी
‘बा’को लस्कर अगाडि बढ्दै छ
पछाडि पाइला मेटिँदै छ
कार्यक्रम सकिएपछि
वसन्तीको घरमा साँझ
खाली भाँडा बज्ने छन्
बोरा र गुन्द्री ओढी सुन्तली सुत्ने छ
कलमबहादुर भारत जाने तयारी गर्नेछ
जोगे भट्टितिर सोझिने छ
बहादुरे ऋण खोज्ने जुक्ति निकाल्ने छ
‘बा’ले के भने बुढी आमैले सोध्ने छिन्
चुनावको पैसा र मासु भात सम्झी
थाल बोकेर गएको डम्मरे
खाली थाल आँगनमा फाल्ने छ
गफको पिटारा बोकी
अर्को टोली फेरि पहाड चढ्ने छ
आफ्नो दुःख आफूसँगै बोकी
थोत्रा गफ सुन्न उही गाउँले
फेरि जम्मा हुने छन्