असार पन्ध्र आएपछि
विदेशबाट चामल मगाएर खानेहरू
फेसबुक टिकटकमा
असारे खेतीको तमासा देखाउँदै थिए

राजनीतिका खेतालाले
धान रोपेर तमासै गरेछन्
कसैले भोटका लागि रोपाईं गरे
त कसैले सञ्‍चार र
सामाजिक सञ्‍जालका लागि

कोही भोटरले गाली गर्लान् भनी
हतार हतार जहाज चढी
धान रोप्‍न पुगे

कसैलाई हरेक साल
गमलामा धान रोप्दै फुर्सद छैन

चटके नेताको
चटके रोपाईंले हुने भए
बजारमा नेपाली धान
फालाफाल हुनुपर्ने

गमलामा रोपेर खान पुग्‍ने भए
खेतमा हलो
किन चलाउनुपर्ने ?

आफ्ना नेताको चटक देखेर
एक कुनामा बसेर किसान हाँस्दै थियो
मिहिनेतअनुसार खान लाउन
नपुग्‍ने खेतीको दुःख सम्झेर

हिलो सफा गरी
लुगा चिटिक्क राख्‍नु है साहेब हो
अर्को वर्ष फेरि चाहिन्छ
चटक देखाउन
फेसबुक, टिकटक र सञ्‍चारमा ।।