पृथ्वी लोकबाट फर्केपछि
भगवान ईन्द्रलाई
नारद रिपोर्ट गर्दै थिए
र भन्दै थिए

भगवान अहिले स्वर्गलोकका असुर
कता गए र कता हराए भनेको त

पृथ्वलोक घुम्दै जाने चरणमा
म नेपाल भन्‍ने देशमा पुगेंछु
र, थाहा भो
सबै असुर
त्यहाँ जम्मा भएका रहेछन्

ती असुरबाट त्यहाँका
जनता अति पीडित रहेछन्
द्रव्य मोहमा आफ्नै जनतालाई
बेच्दा रहेछन्
असुर जातको मान्छे छ भने
सबै खत माफ हुँदो रहेछ

देशको सम्पत्ती केही बाँकी छैन
ढुकुटीमा लुछाचुँडी छ
लुटमार चलेको छ प्रभु लुटमार
नारद गुनासो गर्दै थिए

भगवान ईन्द्रबाट सोधनी भएछ
हे नारद मुनि
त्यहाँका जनताको
दुःख निवारणका निम्ति
तपाईंले किन केही गर्नुभएन त ?

नारदले भनेछन् प्रभु
एकजना मुर्धन्य नेताले
त्यहाँका जनता भेडा हुन्
भनेका थिए रे

सही रहेछ
त्यहाँका जनताले
असुर प्रवृत्तिका शासक
मन पराउँदा रहेछन्

जसले दु:ख बढी दिन्छ
त्यसलाई देशको साँचो
सुम्पिँदा रहेछन्

प्रभु कुनै औषधि छ कि
त्यहाँका जनतालाई
के सही के गलत छुट्याउन सिकाउने ?

भगवान ईन्द्रबाट आज्ञा भएछ
सही नेता छान्‍ने
सही नेतालाई देश जिम्मा लाउने
चुनावमा आफ्नो मतको
सही प्रयोग गर्ने
नै सही औषधि हो नारद मुनि

यही सूचना सम्प्रेषण गरिदिनूस्
सच्चे सचिन्छन्
होइन भने आफैं दुःख पाउँछन्

नारायण नारायण भन्दै
नारद पृथ्वी लोकतिर प्रस्थान गरे