काठमाडौं- केही दिनदेखि बिहानको मौसम धुम्मिन थालेकाले काठमाडौ उपत्यका चिसिँदै छ। त्यससँगै कचौराजस्तो काठमाडौंमा प्रदूषण पनि बढ्दो छ।
यो समाचार तयार पार्दासम्म अहिले काठमाडौं विश्वको प्रदूषित शहरको २२औँ नम्बरमा छ । ‘एक्युआई एयर’ को तथ्यांकअनुसार प्रदूषित शहरको एक नम्बर सूचीमा भारतको नयाँदिल्ली छ, जहाँ शहरलाई प्रदूषित गराउने मुख्य तत्व पीएम विश्व स्वास्थ्य संगठनले तोकेको मापदण्डभन्दा १९.८ गुणा बढी छ ।
यस्तै, दोस्रोमा पाकिस्तानको लाहोर, तेस्रोमा चीनको छेन्दु, चौथोमा कोसोभोको प्रिस्टिना छन्। पाँचौ नम्बरमा किर्गिस्तानको बिश्केक, छैटौँमा उत्तरी म्यासेडोनियाको स्कोपजे र सातौमा भारतको मुम्बाई शहर छन्।
यसैगरी आठौ नम्बरमा घानाको आक्रा, नवौँ नम्बरमा भारतको कोलकाता र दशौं नम्बरमा बंगलादेशको ढाका छन्। यो लाइभ सूची भएकाले घाम लागेको, नलागेको आधारमा घटबढ भइरहन्छ।
काठमाडौंको एयर क्वालिटी इन्डेक्स अहिले ९९ छ। र, शहरलाई प्रदूषित गराउने मुख्य तत्व पीएम २.५ रहेको एक्यूआई एयरले जनाएको छ। काठमाडौंको हावामा पाइएको पीएम २.५ को अहिलेको उपलब्धता विश्व स्वास्थ्य संगठनले तोकेको मापदण्डभन्दा ७ गुणा बढी हो।
