काठमाडौं- आज २६ जुलाई। विश्व इतिहासका असंख्य घटनाले आजको दिन स्मरण गराउँछन्। प्रस्तुत छ, आजको दिन भएका केही विश्व चर्चित घटनाको सारसंक्षेप।
– सन् १८४७- लाइबेरिया देशको स्थापना
सन् १८४७ मा आजकै दिन पश्चिम अफ्रिकी मुलुक लाइबेरियाको स्थापना भएको थियो। उक्त मुलुकको स्थापना खासगरी अमेरिकाबाट मुक्त भएका दासहरूको समूहले गरेको हो। त्यहाँको संविधान पनि अमेरिकाकै संविधानमा आधारित छ। र, राजधानी मोनरोभियाको नामकरण अमेरिकाका पाँचौं राष्ट्रपति जेम्स मोनरोको नामबाट गरिएको हो।
– सन् १९६५- माल्दिभ्स ब्रिटिस पञ्जाबाट मुक्त
सन् १९६५ मा आजकै दिन दक्षिण एसियाली मुलुक माल्दिभ्स ब्रिटिस पञ्जाबाट मुक्त भएको थियो। हिन्द महासागरको उक्त टापु मुलुक ७८ वर्षदेखि ब्रिटेनको उपनिवेश थियो।
– सन् १९९०- अमेरिकामा फरक क्षमताका व्यक्तिलाई विभेदविरुद्ध कानून
सन् १९९० मा आजकै दिन अमेरिकामा फरक क्षमता भएका व्यक्तिमाथि विभेदविरुद्धको कानून पारित भएको थियो।
– सन् २०२१- आप्रवासी बोकेको डुंगा दुर्घटनामा ५७ को मृत्यु
सन् २०२१ मा आजकै दिन आप्रवासी बोकेको डुंगा भूमध्य सागरमा दुर्घटना हुँदा ५७ जनाले ज्यान गुमाएका थिए। लिबियाको अल-खुम्स तटमा उक्त डुंगा समुद्रमा डुबेको थियो। त्यससँगै सन् २०२१ मा भूमध्य सागरमा ज्यान गुमाउनेहरूको संख्या ९८७ पुगेको थियो।
– सन् २०२२- वुहानको सी-फुड मार्केटबाट कोरोना फैलिएको खुलासा
सन् २०२२ मा आजकै दिन चीनको हुनानस्थित वुहानको सी-फुड मार्केटबाट सन् २०१९ को अन्त्यमा कोरोना भाइरस फैलिएको खुलासा भएको थियो। कोरोना भाइरसबाट विश्वभरका लाखौं मानिसको ज्यान गएको थियो।
– सन् २०२३- भारतमा विश्वकै ठूलो अफिस भवन
भारतको गुजरातमा आजकै दिन विश्वकै ठूलो कार्यालय भवन उद्घाटन भएको थियो। गुजरातको सबैभन्दा ठूलो शहर सुरतमा निर्मित उक्त भवन अमेरिकाको रक्षा मन्त्रालय पेन्टागनभन्दा ठूलो छ। ६ लाख ६० हजार वर्गमिटरको उक्त भवन भारतको आर्किटेक्चरल स्टुडियो मोर्फोजेनेसिसले निर्माण गरेको हो।
– सन् २०२५- थाइल्यान्ड र कम्बोडियाका १ लाख ७८ हजारले छाडे घरबार
सन् २०२५ मा २ मुलुकबीच भएको युद्धका कारण थाइल्यान्ड र कम्बोडियाका १ लाख ७८ हजारजनाले आफ्नो थातथलो छाडेर सुरक्षित स्थलमा सर्नुपरेको थियो। थाइल्यान्डका १ लाख ४० हजार र कम्बोडियाका ३८ हजार मानिस अन्यत्र सरेका थिए। २ मुलुकबीच अनपेक्षित रूपमा युद्ध भएको थियो।