काठमाडौँ । नेपाली राष्ट्रिय महिला फुटबल टिमलाई काठमाडौँ महानगरका मेयर बालेन साह बालेन र उपमेयर सुनिता डंगोलले भेटेका छन् ।
मेयर बालेन र उपमेयर सुनिताले शुक्रबार इन्द्र जात्राका लागि अन्तर्राष्ट्रिय प्रतिनिधिसँग भेटघाट गर्न सोल्टी होटल जाँदा राष्ट्रिय टिमलाई पनि भेटेर साफ महिला च्याम्पियनसिपका लागि शुभकामना दिएका हुन् ।
‘भेटेर साफ च्याम्पियनसिपमा राम्रो गर्न शुभकामना दिनु भएको थियो, हौसला प्रदान गर्नु भयो,’ एक खेलाडीले भनिन् ।
२१ भदौदेखि सुरु भएको महिला साफ च्याम्पियनसिपको पहिलो खेलमा नेपालले भुटानलाई ४–० को जित निकालेको थियो । नेपालले सोमबार श्रीलंकासँग खेल्ने तालिका छ ।
समूह ‘बी’मा रहेको नेपालसँगै भुटान र श्रीलंका छन् । यता, समूह ‘ए’ मा साविक तथा प्रतियोगिताको एकमात्र विजेता भारत, पाकिस्तान, बंगलादेश र माल्दिभ्स छन् । समूहका शीर्ष दुई टिम सेमिफाइनल प्रवेश गर्ने छन् । प्रतियोगिताको फाइनल खेल ३ असोजमा हुनेछ ।
