दाङ । विप्लव नेतृत्वको नेकपालाई दोष दिएर बीमा रकम असुल्न आफैले गाडीमा आगो लगाएको खुलेको छ । मंगलबार बिहानै दाङमा एउटा टिपरमा भएको आगजनी बीमाको लोभमा भएको अनुसन्धानबाट खुलेको छ।

घोराही उपमहानगर १८ नवलपुरका गाडी धनी ४१ वर्षीय धनेश्वर भण्डारीले गाडी चालक ३२ वर्षीय अरूण चौधरी र सहचालक २६ वर्षीय आकाश चौधरीलाई आगजनी गर्न निर्देशन दिएको जिल्ला प्रहरी कार्यालय दाङले जनाएको छ ।

उनीहरूलाई नियन्त्रणमा लिएको जिल्ला प्रहरी कार्यालय दाङका प्रहरी नायव उपरीक्षक राजन कुमार गौतमले जानकारी दिए ।

घटना शंकास्पद हुँदै गएपछि प्रहरीले चालक र सहचालकलाई नियन्त्रणमा लिएर अनुसन्धान सुरु गरेको थियो । उनीहरूको बयानका आधारमा भण्डारीलाई प्रहरीले पक्राउ गरेको हो ।

आज बिहान दाङमा रा १ ख १६९४ नम्बरको टिपरमा बिहान साढे ४ बजे आगजनी भएको थियो । विप्लव लगायतका दलले बन्दको आह्वान गरेपछि अघिल्लो दिन नै आगो लगाउने उद्देश्यले ग्यारेजबाट गाडी निकालिएको प्रहरीले जनाएको छ । आगजनीबाट टिपरको अगाडिको भाग पूरै नष्ट भएको छ ।