काठमाडौं- ‘बाबरी रंगमा रंगिएर’, ‘चुलबुल–चुलबुल, चुलबुले बानी तिम्रो त’लगायत चर्चित गीत समावेश चलचित्र ‘बाबरी’ दशैंका दर्शकलाई लक्षित गर्दै प्रदर्शन हुँदैछ। सिनेमा हलमा आउनुअघि नै ‘बाबरी’का गीतले बजार पिटिसकेका छन्।

आगामी १४ असोजमा प्रदर्शन हुने तय भएको चलचित्रमा अभिनेत्री अदिती बुढाथोकी, अभिनेता धीरज मगर र धीरज नाडकर तथा कमलमणि नेपाल, बादल भट्ट, उर्मिला बस्नेतलगायतको अभिनय देख्न पाइने छ।

अभिनेत्री बुढाथोकीले आफ्नो दोस्रो सिनेमाबाट दर्शकको अपार माया पाउने अपेक्षा गरेकी छन्। उनको होम प्रोडक्सनको सिनेमा हो, ‘बाबरी’। र, होम प्रोडक्सन ‘बाबरी फिल्मस्’को पहिलो चलचित्र पनि हो यो। उनका बुवा गणेश बुढाथोकी र आमा पुष्पलताले छोरीको करिअर उजिल्याउन योगदान दिएका छन्, होम प्रोडक्सनमार्फत। यस चलचित्रको निर्देशन र सम्पादन सुरेन्द्र पौडेलले गरेका छन्।

नेपाली हेडलाइनसँग कुराकानी गर्दै अदितीले भनिन्, ‘यो चलचित्र मनोरञ्जन र त्रिकोणात्मक प्रेमकथामा आधारित छ। चलचित्र हेरेर दर्शकले प्रशस्त मनोरञ्जन लिन सक्नु हुनेछ। तीन जनाबीचको प्रेम सम्बन्धको कथामा घुमेको छ, चलचित्र।’

‘बाबरी’ अदितीको दोस्रो सिनेमा हो। आफ्नो डेब्यु चलचित्र ‘कृ’मा उनी साधारण गाउँले युवतीको भूमिकामा देखिएकी थिइन्। ‘बाबरी’मा भने निडर, जे ठान्छ त्यही गरेरै छाड्ने जिद्दी केटीको भूमिकमा आफू रहेको अदितीले बताइन्।

‘कोभिडका कारणले पहिलोभन्दा दोस्रो चलचित्रको तयारी राम्रोसँग गर्न पाएँ। अभिनयमा अझ निखार ल्याएकी छु,’ उनले भनिन्, ‘त्यसैले बाबरीबाट धेरै आशा राखेकी छु।’

चलचित्रको ५० प्रतिशत छायांकन सिक्किममा गरिएको छ। र, नेपालमा मोरङको लेटाङ र इलामका दृश्य समेटिएका छन्।

‘आईटी’की स्नातक अदिती प्रतिभावान अभिनेत्री हुन्। मोडलिङमा जमेपछि अभिनय यात्रामा अगाडि बढेकी हुन्। मोडलिङ गर्दा गर्दै उनी करिअरलाई उचाइ दिन मुम्बई पुगिन्। भारतमा उनले अभिनय गरेका म्युजिक भिडियो ‘स्टेप कट’ र वेब सिरिज ‘इन्साइड एज २’ चर्चितमध्येका हुन्। यस्तै, सन् २०१३ मा उनले बेस्ट स्किन विधामा ‘जोय पपया ग्ल्यामहन्ट अवार्ड’ जितेकी थिइन्। मोडलिङमा छँदा उनी ‘नभ्यता’, ‘नारी’, ‘एम एन्ड एस’लगायत म्यागेजिनमा देखिएकी थिइन्। अनि, ‘अमेजन’, ‘ब्लिन्ज’लगायत सपिङ स्टोरहरूमा पनि उनी देखिइसकेकी छन्।

यस चलचित्रमा अभिनेत्री तृप्ती नाडकरका सुपुत्र धीरज नाडकरको पनि अभिनय देख्न पाइने छ। धीरज नाडकरको यो ‘डेब्यू’ सिनेमा हो। ‘नेपाल मेरो दोस्रो घर हो। यहींबाट चलचित्रमा डेब्यू गर्न पाउँदा मेरो खुशीको सीमा छैन,’ धीरजले नेपाली हेडलाइनसँग भने।