काठमाडौं- विगत २० वर्षदेखि प्रशंसनीय खोज विधी (एप्रिसिएटिभ इन्क्वायरी) को नियमित खोज, अनुसन्धान तथा तालिम सञ्चालन गर्दै आएका डा. रामचन्द्र लामिछानेको ‘एप्रिसिएटिभ इन्क्वायरी’ बोलको गीत सार्वजनिक भएको छ।
व्यक्ति तथा संस्थाहरूको सवल पक्ष तथा सफलताका कारणहरू खोजी नयाँ लक्ष्य निर्धारण गरेर जीवनको तथा संस्थाको नयाँ मार्गचित्र बनाई सोही मुताविक कार्य योजना बनाई कार्यान्वयन गरेमा व्यक्तिको जीवन तथा संस्थामा आमुल सकारात्मक रूपान्तरण आउँछ भन्ने सन्देश गीतले दिएको छ।
व्यक्ति वा संस्थामा रहेका सकारात्मक तत्त्व, सफलताका कारण तथा सफलतातर्फ उत्प्रेरणा गर्ने जीवनदायी ऊर्जा एवं भविष्यका चाहनाहरूको पहिचान गरी भविष्यको मार्गचित्र निर्माण गरी तिनलाई साकार पार्न आवश्यक पर्ने संरचना तथा कार्ययोजनाको तयार गर्ने तथा सोही मुताविक जीवन वा संस्थालाई अगाडि बढाउने विधिलाई ‘एप्रिसियटिभ इन्क्वायरी’ भनिन्छ।
सन् १९८८ मा अमेरिकाको केसवेस्टर्न विश्वविद्यालयको वेदरहेड स्कुल अफ म्यानेजमेन्टमा प्रोफेसर डेभिड कुपरराइडरले यस विधिलाई प्रतिपादन गरेका थिए। डा. लामिछानेले सन् २००७ मा यसै विश्वविद्यालयवाट सर्टिफिकेसन कोर्ससमेत गरेका थिए। उनले विद्यावारिधिको क्रममा यस विधिको प्रयोगसमेत गरेका थिए।
लामो समयदेखि योजना तर्जुमा, शान्ति निर्माणकर्ता, सञ्चार तथा प्राकृतिक स्रोत साधन व्यवस्थापनका क्षेत्रमा योगदान दिँदै आएका डा. लामिछानेले आफूले तालिम, अनुसन्धान तथा योजना तर्जुमा प्रक्रियामा प्राप्त अनुभवहरूलाइ सँगालेर यो गीत तयार गरेको बताउँछन्। प्रशंसनीय खोजको नेपालका विभिन्न जिल्ला तथा अन्तर्राष्ट्रिय स्तरमा समेत प्रशिक्षण दिँदै आएका लामिछानेले जीवन रूपान्तरण गर्न चाहने सबैका लागि यो गीत मार्गनिर्देशक हुने बताए। ‘एप्रिसिएटिभ इन्क्वायरी’को सञ्जाल संसारभर भए पनि यस विषयको यो नै पहिलो गीत रहेको डा. लामिछाने जानकारी दिए।
‘एप्रिसिएटिभ इन्क्वायरी’को प्रत्येक तीन वर्षमा विश्व सम्मेलन हुने गरेको छ। सन् २००९ मा चौथो विश्व सम्मेलन नेपालमा भएको थियो भने तत्कालीन राष्ट्रपति डा. रामवरण यादवले सम्मेलनको उदघाटन गरेका थिए। त्यस सम्मेलनमा ४२ देशका करिब ४०० जना सहभागी थिए। डा. लामिछाने आयोजक संस्था परिकल्पना नेपालका महासचिव थिए भने सम्मेलनका संयोजक। सन् २०१२ मा बेल्जियमको गेन्ट शहरमा भएको पाँचौं सम्मेलनमा डा. लामिछाने सहभागी भएका थिए। यस्तै, सन् २०१५ मा दक्षिण अफ्रिकाको जोहानेसबर्गमा भएको छैटौं विश्व सम्मलेनमा अतिथि वक्ताका रूपमा सहभागी भएका थिए। सन् २०१२ मा चीनको सियान शहरमा डा. लामिछानेले नै ‘एप्रिसिएटिभ इन्क्वायरी’ भित्र्याएका थिए भने त्यसपछि चीनमा निरन्तरमा लामिछानेका तालिमहरू सञ्चालन हुँदै आएका छन्।
देशभित्र र बाहिर गरी ४०० भन्दा बढी कार्यशाला तथा तालिमहरू सञ्चालन गरेका डा. लामिछानेले कामको सिलसिलामै यो गीत तयार भएकोले यसले सहभागीहरूलाई विषयवस्तु बुझ्न सहज हुने बताए।
वरिष्ठ संगीतकार नरहरि प्रेमीको संगीत रहेको यस गीतमा नरहरि प्रेमी र सुजीता राई एवं साथीहरूको स्वर छ। यसअघि सकारात्मक उत्प्रेरणा जगाउने ‘हामी सबैले सक्दछौं’ र ‘खुशी हुँदै फर्कन स्वदेशमा’ तथा ‘सकारात्मक सोचेके बा’ बोलको भोजपुरी गीत सार्वजनिक भइसकेका छन्। डा. लामिछानेका गीतहरू ‘द इरिप्स’ नामक युट्युब च्यानलमा सुन्न सकिन्छ।
गीत हेर्नुहोस्
