बलिउड फिल्ममा भिलेनको भूमिकामा ख्याति कमाएका शक्ति कपुरका छोरा सिद्धान्त लागूऔषध मुद्दामा पक्राउ परेका छन्।
सिद्धान्तको रगत परीक्षणमा लागूऔषध सेवन गर्ने गरेको पुष्टि भएको छ। भारत बैंगलुरुमा आइतबार राति भएको एक पार्टीमा उनले लागूऔषध सेवन गरेको पुष्टि भएको हो। उनी आफू पनि बलिउड अभिनेता हुन्। उनीसहित अन्य चारजनालाई पनि प्रहरीले पक्राउ गरेको छ।
होटलमा छापा मार्दा एमडीएमए नामक लागूऔषध र गाँजा पनि बरामद भएको छ। उक्त पार्टीमा ३५ जना सहभागी थिए। पार्टीमा लागूऔषध प्रयोग भइरहेको सूचनापछि प्रहरीले छापा मारेको थियो।
होटलमा कसरी लागूऔषध र गाँजा पुग्यो भन्नेबारे पनि प्रहरी अनुसन्धान थालेको छ। केही दिनअघि यस्ता पार्टीमा लागूऔषध प्रयोग हुने गरेको उल्लेख गर्दै तत्काल रोक लगाउन होटल व्यवसायीहरूलाई बोलाएर आग्रह गरेको थियो।
प्रहरीले सिद्धान्तविरुद्ध नार्कोटिक्स ड्रग्स एन्ड साइकोट्रपिक सब्स्ट्यान्सेज कानूनअनुसार मुद्दा दायर गर्दैछ। उक्त कानूनअनुसार उनलाई ६ महिना जेल र १० हजार रुपैयाँ जरिवाना हुन सक्छ। उनका साथबाट लागूऔषध बरामद भएको अवस्थामा १० देखि २० वर्ष जेल र एकदेखि दुई लाख भारतीय रुपैयाँ जरिवाना पनि हुन सक्छ।
