अभिनेत्री मिरुना मगरमाथि भएको अभद्र व्यवहार सम्बन्धि घटनामा मुगुका भिक्षु फुर्वा तामाङले मगरसमक्ष माफी मागेका छन्।
मगरले पनि माफी दिँदै कुनै पनि जाति, धर्म र सम्प्रदायप्रति असर पुग्ने आशयले त्यो काम नगरेको भए पनि आकस्मिक प्रतिक्रिया जनाउने क्रममा त्यो घटना भएको भन्दै क्षमायाचना गरेकी छन्।
१५ जेठमा सिभिल मलको क्यूएफएक्स हल अगाडि दर्शकसँग साक्षत्कार गर्ने बेलामा अभद्र व्यवहार भएको भन्दै मगरले प्रहरीमा उजुरी दिएकी थिइन्। प्रहरीले तामाङलाई पक्राउ गरेको थियो।
उनको रिहाइ माग गर्दै मंगलबार चाबहिल केएल टावर अगाडि प्रदर्शन भएको थियो। प्रहरीले मंगलबार दिउँसो तामाङलाई ३ हजार धरौटीमा छोडेको थियो।
सहमति पत्रमा अभिनेत्री मगर र आरोपित फुर्पा तामाङले हस्ताक्षर गरेका छन्।
चलचित्र निर्देशक रामबाबु गुरुङ, अभिनेता दयाहाङ राई, निर्माता मणिराम पोखरेल, कलाकार विजय बराल, सञ्जोग लाफा मगर, पशुपति राई र कालीप्रसाद बाँस्कोटा मिरुनाका तर्फबाट साक्षी बसेका छन् । भिक्षुको तर्फबाट खेन्पो कमल भण्डारी, मिङुग्यर तामाङ, राजु गुरुङ, कर्मा राप्के, हिस्से लुन्डुप लामाले हस्ताक्षर गरेका छन्।
