गज्जबका सम्झना छन् सानाका
वारि नेपाल पारि भारतका
धेरै दिन भो नदेखेको भन्दै
पारिका यता आएको सम्बन्ध
कोही बिरामी भो भने पारि दौडिँदै गएको
राजनीतिबिना व्यवहारको सम्बन्ध
मन लागे उताका यता आएका छन्
यताका उता गएको सम्बन्ध
मोहना वारि-पारि
आफ्नैजस्तो लाग्ने सम्बन्ध !
को गरिब को धनी ?
कुनै मतलब नभएको सम्बन्ध
लखनऊ, दिल्ली, नैनिताल जाँदा
रेलमा ठाउँ नभए पनि
बस्न ठाउँ दिएको सम्बन्ध
स्कुल, कलेज पढ्दा
भारतको हो कि नेपालको
कुनै मतलब नभएको सम्बन्ध !
आउँदाखेरि चाइनिज कलम ल्याइदेऊ
ल्याइदिएपछि साथीभाइसँग
खुशी साटेको सम्बन्ध !
तिम्रो देश हाम्रो कलेजभन्दा गरिब छ
झोला बोकी निस्किहाल
भन्नेसम्मको आजभोलिको सम्बन्ध
अहिले मोहनापारि जाँदा बिरानो लाग्ने
कता हरायो कता बिलायो ?
त्यो पुरानो सम्बन्ध !
अहिले खोक्रो राष्ट्रीयता
दुवैतिरको स्वार्थी राजनीतिले खायो
राजनीतिमा बिलायो हाम्रो सम्बन्ध