काठमाडौँ । चलचित्र ‘प्रेमगञ्ज’ले ज्यादाभन्दा ज्यादा दर्शकमाथि पुग्ने भन्दै टिजरलाई कपी राइट फ्रि गर्ने निर्णय गरेको छ । भोलि सार्वजनिक हुने टिजरलाई जोकोहीले आफ्नो माध्यममा राख्न सक्ने छन् । निर्देशक परिच्छेद सेनले फिल्मको टिजर युट्युब, फेसबुक, टिकटक इन्स्टामा निर्धक्क राख्न सकिने जानकारी गराए ।
निर्देशक सेनले यसरी राखिएको टिजरमा सर्वाधिक दर्शक ल्याउने तीनै प्लेटफर्मका विजेतालाई पुरस्कार दिने घोषणा गरिएको जानकारी गराएका छन् । तीन प्लेटफर्ममा तीन विजेताले क्रमशः २५ हजार, १५ हजार र १० हजार रुपैयाँ पुरस्कार प्राप्त गर्ने छन् ।
‘फिल्मले भ्युज, कमेन्ट र शेयरका आधारमा उत्कृष्ट हुने तीन युट्युब च्यानल, फेसबुक र टिकटकरलाई फिल्मको प्रिमियर सोमा रेड कार्पेटसहित आकर्षक पुरुस्कार प्रदान गरिनेछ’ सेनले भने ।
निर्माता अनन्तमान श्रेष्ठका अनुसार यो अफर वैशाख ३ देखि साउन २५ गतेसम्म चल्ने छ । चलचित्रको टिजर यही तीन गते सार्वजनिक हुँदै छ । श्रेष्ठका अनुसार टिजर सामाजिक सञ्जालमा सेयर गर्दा ह्यासट्याग प्रेमगञ्ज भदौ ३, प्रेमगञ्ज हेर्ने दिन भनेर फिल्मको अफिसियल पेजमा मेन्सन गर्दै सेयर गर्नु पर्ने छ । भिडियो बुढासुब्बा युट्युब च्यानलबाट डाउनलोड गरेर अपलोड गर्न सकिने पनि निर्माण टिमले जनाएको छ ।
सेनकै लेखन रहेको चलचित्रबाट बैंकर पृष्ठभूमिका तेज गिरीले डेब्यू गर्दै छन् । फिल्ममा बेनिशा हमाल, सम्पदा बाँनिया, पवन भट्टराई, सुप्रिया खनाल, राइडर प्रशान्त, सिमरन खड्का आदि कलाकारको अभिनय रहेको छ । यस्तै, फिल्ममा नरेश पौडेल, रश्मी भट्ट, सञ्जोग रसाइली, गीता अधिकारीको पनि अभिनय देख्न सकिन्छ ।
स्पट व्यायका रुपमा लामो समय काम गरेका राजु फुयालको प्रस्तुति रहेको फिल्म चलचित्र चौतारीको ब्यानरमा बनेको हो । यस चलचित्रका कार्यकारी निर्माता अनन्तमान श्रेष्ठ हुन् । सञ्जय लामाको छायांकन रहेको फिल्म डेढ करोडको लगानीमा बनेको हो ।
