टोक्यो विश्वविद्यालय अस्पतालले विश्वमा पहिलोपटक दुई फरक ब्लड ग्रुप भएका मानिसबीच फोक्सो प्रत्यारोपण गराउन सफलता हासिल गरेको छ। मंगलबार अस्पतालले जारी गरेको वक्तव्यअनुसार १० देखि १९ वर्ष उमेर समूहकी किशोरीमा फरक ब्लड ग्रुपका उनकै पिताको फोक्सोको एक अंश सफलतापूर्वक प्रत्यारोपण गरिएको हो।

फोक्सो प्रत्यारोपणपछि किशोरीको स्वास्थ्य स्थिर रहेको र उनी डिचार्ज भइसकेको अस्पतालले बताएको छ। नाम नखुलाइएकी किशोरीलाई सानैमा रक्त क्यान्सर भएको थियो। उपचारका लागि बोन म्यारो प्रत्यारोप गरिँदा फोक्सोको ब्रोन्कोलीमा असर परेको थियो। स्थिति बिग्रिँदै गएर गत सेप्टेम्बरदेखि उनी कृत्रिम रूपमा श्वास लिँदै आएकी थिइन्।

किशोरीको शरीरको आकारको हिसाबमा उनलाई दुई दाताको आवश्यकता थियो। यही वर्ष फेब्रुअरीमा उनका आमा र बुवाले उनलाई फोक्सोको हिस्सा दान गरे। किशोरी र उनको आमाको ब्लड ग्रुप एउटै अर्थात् ‘ओ’ रहेको र उनका पिताको ब्लड ग्रुप ‘बी’ रहेको अस्पतालले बताएको छ।

फोक्सो प्रत्यारोपणपछि चलाइएको स्टेरोइड थेरापीका कारण किशोरीको शरीरले ती प्रत्यारोपित अंगलाई स्वीकारेको छ। उनले अहिले कृत्रिम श्वासप्रश्वासको सहारा लिनु नपरेको र कसैको सहाराबिना हिँडडुल गर्न सक्ने अस्पतालले बताएको छ।

कलेजो र मिर्गौला प्रत्यारोपण पहिलेदेखि नै फरक ब्लड ग्रुप भएका मानिसबीच हुने गर्थ्यो। तर, फोक्सो प्रत्यारोपणमा प्रापकको शरीरले शीघ्र प्रत्यारोपित हिस्सालाई तत्काल अस्वीकार गर्छ। त्यसैले बिरामीले उही ब्लड ग्रुप भएका दिमागी रूपमा मृत दाता पर्खेर बस्नु पर्थ्यो।

‘नयाँ उपचार पद्धतिले उही ब्लड ग्रुपका दाता नपाएर समस्या भोगिरहेका मानिसको जीवन बचाउन सक्छ,’ किशोरीको उपचारमा संलग्न चिकित्सक हिरोशी दातेले भने।

जापान टाइम्सबाट