चालु आर्थिक वर्ष ०७८-७९ मा नेपालको आर्थिक वृद्धिदर ३.९ प्रतिशतमा समेटिने प्रक्षेपण एसियाली विकास बैंक (एडीबी)ले गरेको छ।

एडीबीले सार्वजनिक गरेको प्रतिवेदनमा यस्तो प्रक्षेपण गरिएको हो। नेपाल सरकारले भने चालु आवको आर्थिक वृद्धि सात प्रतिशत रहने लक्ष्य निर्धारण गरेको थियो। उक्त वृद्धिदर हासिल हुने लक्षण नदेखिएको एडीबीको प्रक्षेपणमा उल्लेख छ।

तथापि, आगामी आव ०७९-८० देखि भने नेपालको अर्थतन्त्रमा सुधार हुने एडीबीको प्रक्षेपण छ। कोभिड–१९ महामारी शुरु भएको आव ०७६-७७ मा नेपालको आर्थिक वृद्धि २.१ प्रतिशत ऋणात्मक थियो। आगामी आवमा सबै अवस्था सामान्य रहेमा नेपालले पाँच प्रतिशतको आर्थिक वृद्धि हुने एडीबीको प्रतिवेदनमा उल्लेख छ। अर्थात्, सरकारले निर्धारण गरेको सात प्रतिशतको आर्थिक वृद्धि आगामी आवमा पनि सम्भव देखिएको छैन। गत आव ०७७–७८ मा नेपालले २.३ प्रतिशतको मात्र आर्थिक वृद्धि हासिल गरेको थियो।

एडीबीको आकलनमा चालु आवको मुद्रास्फिती ६.५ प्रतिशतमा सीमित रहनेछ। चालु खाताघाटा पनि कुल गार्हस्थ्य उत्पादनको तुलनामा बढेर ९.७ प्रतिशत पुगेको प्रतिवेदनमा उल्लेख छ।