भारतीय व्यावसायी गौतम अडानीको सम्पति बढेर १०० अर्ब डलर पुगेको ब्लुमवर्ग बिलेनियर इन्डेक्सले जानकारी दिएको छ। अडानी सय अर्ब डलर हुने एक मात्र भारतीय मात्र होइन, एक मात्र गैर–गोरा व्यवसायी बनेका छन् ।
ब्लूमवर्ग बिलेनियर इन्डेक्सका अनुसार विश्वमा अहिले दस जना व्यक्तिसँग मात्र १०० अर्ब डलर सम्पति छ र ती सबै पुरुष हुन्।
विद्युतीय वाहन निर्माता टेस्लाका सिईओ इलोन मस्क, खुद्रा व्यवसाय अमेजनका सस्थापक जेफ बेजोस, बर्कशायर हाथावेका अध्यक्ष वारेन बफेट, फ्रेन्च व्यवसायी वर्नार्ड आर्नोल्डहरु लगायत दिग्गज सय अर्ब डलर क्लबमा छन्।
महामारीको समयमा शेयर बजारको मूल्य आकाशिदाँ कयौं अर्बपतिको सम्पति बढेको छ । तर अडानीको उदय भने अरुको भन्दा पनि थप असाधारण रह्यो।
अडानी समूहका ५९ वर्षे सस्थापक अडानीको स्वामित्वमा बन्दरगाहदेखि वायुसेवादेखि कोइलासम्मको कम्पनी छ। गत दुई वर्षको अवधिमै अडानीको सम्पति ९० अर्ब डलरले बढिसकेको छ ।
अडानी समूहका केही कम्पनीको शेयर मुल्य सन् २०२० जुन यता १००० प्रतिशतसम्मले बढेको देखिएको छ। यसले अडानीका लगानीकर्ता उनको क्षमताप्रति आसावादी छन् भन्ने देखाउँछ।
अडानी विश्वको दसौं धनी व्यक्तिमा उक्लिएका छन्। ब्लुमवर्गका अनुसार अर्का भारतीय व्यवसायी मुकेश अम्बानी ९९ अर्ब डलरका साथ अडानीभन्दा एक स्थानमात्र तल छन्।
रिलायन्स इन्डस्ट्रिजका मालिक अम्बानी विगतमा तेल व्यवसायमा केन्द्रीत थिए । पछिल्लो समय उनले आफ्नो व्यवसायलाई हरित उर्जा तथा प्रविधिजस्ता अन्य नयाँ क्षेत्र केन्द्रीत गर्न थालेका छन्।
