काबुल- उत्तरी अफगानिस्तानको बल्ख प्रान्तमा शुक्रबार दुईवटा सवारीसाधन आपसमा ठोक्किँदा कम्तीमा चार जनाको मृत्यु भएको छ भने अन्य छ जना घाइते भएका छन् । प्रान्तीय प्रहरी कार्यालयले दुर्घटनाबारे जानकारी दिएको हो ।
प्रहरीका अनुसार राजधानी काबुललाई बल्ख प्रान्तसँग जोड्ने राजमार्गअन्तर्गतको ‘हैरातान डुअल क्यारिजवे’ मा तीव्र गतिमा गुडिरहेको एक सवारीसाधनलाई ट्रकले ठक्कर दिँदा दुर्घटना भएको हो । दुर्घटनामा चार जनाको घटनास्थलमै मृत्यु भएको र छ जना घाइते भएको प्रहरीले जनाएको छ ।
प्रारम्भिक अनुसन्धानका क्रममा लापर्बाहीपूर्वक सवारी चलाउनु र ट्राफिक नियमको पालना नगर्नु दुर्घटनाको मुख्य कारण देखिएको प्रहरीले जनाएको छ ।
युद्धग्रस्त अफगानिस्तानमा लापर्बाहीपूर्वकसवारीसाधन सञ्चालन, क्षमताभन्दा बढी यात्रु बोक्ने प्रवृत्ति, जीर्ण सडक तथा अपर्याप्त ट्राफिक पूर्वाधारका कारण सडक दुर्घटना मृत्युका प्रमुख कारणमध्ये एक बनेका छन् ।