वागमती सफाइ महाअभियानको ४६४औँ सातामा निलो र पहेँलो पुलको नदी क्षेत्रमा सफाइ गरी चार मेट्रिक टन फोहोर व्यवस्थापन गरिएको छ।
महाअभियानको ४६४औँ साता एवं तिलगंगा महिला समूहको ३६४औँ सातामा नीलो र पहेँलो पुलको वागमती नदी क्षेत्र, सडकका पेटी सरसफाइसमेत गरिएको अभियानकर्मी किशोरसिंह शाहीले जानकारी दिए।सफाइसँगै त्यस क्षेत्रमा घरदैलो कार्यक्रमसमेत गरिएको थियो।
घरदैलो कार्यक्रममा प्रमुख अभियानकर्मी एवं नेपाल सरकारका पूर्वमुख्यसचिव लीलामणि पौडेल, काठमाडौँ महानगरपालिका–९ का सदस्य टेकराज अधिकारी, अधिकार सम्पन्न वागमती सभ्यता एकीकृत विकास समितिका सदस्य दिव्या घिमिरे, वागमती फोहोर उन्मूलन उपभोक्ता संस्थाका पदाधिकारी एवं सदस्य, स्थानीयवासी, अधिकार सम्पन्न वागमती समितिका कर्मचारी र वागमती सफाइ अभियानकर्मीको सक्रियता थियो।
५ जेठ ०७० देखि शुरु भएको सफाइ महाअभियान हरेक शनिबार बिहान दुई घण्टा निरन्तर चलिरहेको छ। जाडो, गर्मी, वर्षा, चाडपर्वलगायत प्रतिकूल अवस्थामा पनि सफाइ महाअभियान रोकिएको छैन। महाअभियानबाट प्रभावित भएर काठमाडौँ उपत्यकामा वागमतीका सहायक नदी सफाइ अभियान पनि शुरु भएको छ। हाल राजधानीमा २५ स्थानमा सफाइ भइरहेको छ।
राससबाट