काठमाडौँ । सप्तरीमा टिपरको ठक्करबाट नेपाल विद्युत प्राधिकरणका चालकको मृत्यु भएको छ । प्राधिकरणको गाडीलाई टिपरले ठक्कर दिँदा चालकको मृत्यु भएको हो । घटनामा अन्य पाँच जना घाइते भएका छन् ।
पूर्व–पश्चिम राजमार्गअन्तर्गत खडक नगरपालिका ५ रञ्जितपुरमा पश्चिमबाट पूर्वतर्फ जाँदै गरेको विद्युत प्राधिकरणको प्रदेश २–०१–००१ च ०३३४ नम्बरको बोलेरो गाडीलाई ना. ७ ख २६५८ नम्बरको टिपरले ठक्कर दिएको प्रहरीले जनाएको छ । टिपरको ठक्करबाट चालक बोदे बर्साइन नगरपालिका ५ बस्ने २६ वर्षीय शिवराज यादवको मृत्यु भएको हो ।
दुर्घटनामा सोही नगरपालिकाको ३० वर्षीय शैलेश यादव, ३० वर्षीय महेश चौधरी, वडा नम्बर ५ का २६ वर्षीय वृजेश कुमार यादव, ३० वर्षीय जयशंकर साह र सिरहाको लहान नगरपालिका ८ बस्ने ३५ वर्षीय अरुण कुमार सिंह रहेका छन् । उनीहरूको स्थानीय अस्पतालमा उपचार भइरहेको छ । टिप्पर चालकलाई प्रहरीले नियन्त्रणमा लिएको छ ।