काठमाडौं- स्टार सिटी युवा क्लब र आयोजक फारवेस्ट पशुपति युवा क्लब एनआरएनए छैटौं फारवेस्ट पशुपति कप २०८० फुटबल प्रतियोगिताको सेमिफाइनलमा प्रवेश गरेका छन्।
फारवेस्ट पशुपति युवा क्लबको आयोजनामा जारी प्रतियोगिताको पाँचौं दिन भएका दुई क्वाटरफाइनल खेलमा जित हात पार्दै स्टार सिटी र आयोजक फारवेस्ट सेमिफाइनलमा पुगेका हुन्।
धनगढी रंगशालामा भएको पहिलो क्वाटरफाइनल खेलमा स्टार सिटी युवा क्लबले घोडाघोडी युवा क्लब सुक्खडलाई १–० ले हराउँदै अन्तिम चारमा स्थान पक्का गरेको छ। स्टार सिटीका लागि क्षितिज भण्डारीले एक मात्रै निर्णायक गोल गरे। दोस्रो हाफको ७ मिनटमा पाएको पेनाल्टीलाई क्षितिजले गोलमा परिणत गरे। निर्णायक उनी खेलको म्यान अफ द म्याचसमेत बने। उनले नगद ५ हजारसहित ट्रफी पाएका छन्।
यस्तै, दोस्रो क्वाटरफाइनल खेलमा आयोजक फारवेस्ट पशुपति युवा क्लब विजयी हुँदै सेमिफाइनल यात्रा तय गरेको छ। पहिलो खेलमा बाई पाएको फारवेस्ट पशुपतिले पुनर्वास युनाइटेडलाई सडन डेथमा ८-७ ले हराएको हो। निर्धारित समय दुवै टोलीले गोलरहित बराबरी खेलेका थिए। फारवेस्टको जितमा गोलरक्षक लोकेश चौधरीले उत्कृष्ट प्रदर्शन गर्दै पुनर्वास युनाइटेडका दुई खेलाडीको प्रहार बचाए। उनी नै खेलको म्यान अफ द म्याचसमेत बने। उनले नगद ५ हजारसहित ट्रफी पाएका छन्।
प्रतियोगिताअन्तर्गत बुधबार दुईवटा क्वाटरफाइनल खेल हुनेछन्। तेस्रो क्वाटरफाइनलमा सुदूरपश्चिम ११ स्पोर्टस क्लब र बीएस १५ फुटबल क्लबले प्रतिस्पर्धा गर्नेछन्। चौथो क्वाटरफाइनलमा इलाइट युवा क्लब र नेपाल प्रहरी सुदूरपश्चिम प्रदेश खेल्नेछन्। पहिलो खेल दिउँसो साढे १२ र दोस्रो साढे २ बजे धनगढी रंगशालामा हुनेछन्। १४ पुससम्म धनगढी रंगशालामा प्रतियोगिता हुनेछ।
प्रतियोगिताको विजेताले पाँच लाख र उपविजेताले २ लाख पाउने छन्। प्रतियोगिताको उत्कृष्ट खेलाडीलाई २५ हजार तथा विभिन्न विधाका उत्कृष्टले १५-१५ हजार रुपैयाँ पुरस्कार पाउने आयोजक फारवेस्ट पशुपति युवा क्लबका अध्यक्ष खेम रावतले बताए। प्रत्येक खेलको म्यान अफ द म्याचले पाँच हजार नगद पाउने छन्। प्रतियोगिताको मुख्य प्रबर्द्धकमा सुदूरपश्चिम प्रदेश खेलकुद परिषद छ भने मुख्य प्रायोजक एनआरएनए छ।
