चितवनबाट शुरु भई
काठमाडौंमा क्षणिक अल्पविराम लिएको
लावा लस्करसहितको चर्चित
पाँचतारे जनवादी बिहे

बिहेको झकिझकाउ
र पाहुनाको हुल देख्दा

जनयुद्धमा हतियार बोकेका
कैलालीका कमरेड कविराम
युद्धको बेला कमरेडहरूले
फलाकेका भाषण सम्झिरहेका थिए

राज्यले नागरिकमाथि गरेको दमन
बुर्जुवा वर्गको थिचोमिचो
भ्रष्‍टाचार
जनताको गरिबीको कारण

माओ र मार्क्सका सिद्धान्त
नयाँ शासन व्यवस्था
जनताद्वारा शासित
र जनताका लागि
भनेर मुठ्ठी बटारेर
पाँचतारे कमरेडका टोलीले
गरेको भाषण

आफ्नो गोली लागेको शरीर
आफूले फकाएर जनयुद्धको
भुंग्रोमा झोसेका
आफ्ना शहीद भाइ र बैनिलाई
सम्झिँदै थिए कमरेड

आफूलाई जनयुद्धको
हुलमा मिसाउने
कमरेडहरूको बसाइ
व्यवहार, संगत
बसाइ, लवाइ सम्झिँदै

खाडीको गर्मीमा
बेल्चा हान्दै सोचिरहेका थिए

क्रान्तिले बल्ल ३६० डिग्रीको
फन्को पूरा गर्‍यो