काठमाडौँ – नेपाली कांग्रेसको १४ औं महाधिवेशनअन्तर्गत नेतृत्व चयनको प्रक्रिया आजदेखि सुरु हुँदैछ । केन्द्रीय निर्वाचन समितिले शुक्रबार बेलुका मतदाताको अन्तिम नामावली प्रकाशन गरेको छ । शनिबार बिहान १० बजेदेखि बेलुका ५ बजेसम्म उम्मेदवारको मनोनयन दर्ता गर्ने कार्यक्रम रहेका छ ।
शनिबार केन्द्रीय सभापति, उपसभापति, महामन्त्री र सहमहामन्त्रीसहित १३४ पदमा उम्मेदवारको मनोनयन गर्ने कार्यक्रम रहेको निर्वाचन समितिका संयोजक गोपालकृष्ण घिमिरेले जानकारी दिए । ‘शनिबार मनोनयन दर्ता हुन्छ, आइतबार उम्मेदवारको अन्तिम नामावली प्रकाशन हुन्छ,’ उनले भने, ‘सोमबार बिहान ८ बजेदेखि मतदानको कार्यतालिका बनाएका छौं ।’ उनले मतदान सकिएपछि सभापतिको मत गणना तत्काल मतदान स्थलमै हुने र बाँकी पदको मतगणना केन्द्रीय कार्यालयमा हुने जानकारी दिए ।
समितिले अहिले बिहान १० बजेबाट ५ बजेसम्म उम्मेदवारको मनोनयन दर्ता गर्दैछ । मनोनयन दर्ताका लागि १० वटा टेबल तयार गरिएको समितिले जनाएको छ । त्यसपछि उम्मेदवारी मनोनयन दर्ता उपर दाबी विरोध र जाँचबुझ बेलुका ५ देखि ७ बजेसम्म, दाबी विरोधउपर निर्णय बेलुका ७ देखि ९ बजेसम्म र उम्मेदवारको नामावली प्रकाशन बेलुकी १२ सम्ममा गर्ने कार्यसूची छ ।
त्यस्तै, कोही उम्मेदवारले मनोनयन फिर्ता लिन चाहेमा आइबार बिहान ११ बजेसम्ममा फिर्ता लिन सक्नेछन् भने उम्मेदवारको अन्तिम नामावली आइतबार दिउँसो १२ बजे प्रकाशित गर्ने समितिले जनाएको छ । मतदान भने सोमबार बिहान ८ बजेबाट हुनेछ ।
मतदानका राष्ट्रिय सभा गृह र भृकुटी मण्डपमा हुनेछ । कांग्रेस महाधिवेशनमा ४ हजार ७ सय ४३ जना मतदाता छन् ।