नयाँदिल्ली- पेट्रोलियम पदार्थमा बढ्दो मूल्यवृद्धि नियन्त्रणका लागि भारतले आफ्नो आपतकालीन भण्डारबाट ५० लाख ब्यारेल कच्चा तेल निकाल्ने योजना बनाएको छ ।
यसअघि अमेरिका, जापानलगायत मुलुकले पेट्रोलियम पदार्थको मूल्यवृद्धि नियन्त्रणमा यस्तो उपाय अवलम्बन गरिसकेका छन् । सरकारी समाचार एजेन्सी पीटीआईका अनुसार भारतसँग ३.८ करोड क्रुड आयलको आपतकालीन भण्डार छ ।
भारतले देशको पूर्वी र पश्चिम तटीय क्षेत्रका तीन स्थानमा कच्चा तेलको भूमिगत रणनीतिक भण्डार बनाएको छ । तिनै भण्डारबाट कच्चा तेल निकाल्ने भारतको योजना छ ।
आगामी सातदेखि १० दिनमा ती भण्डारबाट कच्चा तेल निकाल्ने तयारी भइरहेको सरकारी अधिकारीहरूले बताएका छन् । त्यसपछि पनि आवश्यकताअनुसार तेल निकाल्न जारी रहने उनीहरूको भनाइ छ ।
मंगलोर रिफाइनरी एन्ड पेट्रोकेमिकल्स लिमिटेड तथा हिन्दुस्तान पेट्रोलियम कर्पोरेसन लिमिटेडलाई उक्त इन्धन बिक्री गरिनेछ । दुवै कम्पनी ती भूमिगत भण्डारसँग पाइपलाइनमार्फत जोडिएका छन् ।
