काठमाडौँ । ३७ हजार फिटको उचाइमा उडिरहेको विमानका चालकहरू निदाउँदा विमान अवतरण गर्न छुटाएको समाचार बाहिर आएको छ । दुई पाइलटहरू निदाउँदा उनीहरूले धावनमार्ग छुटाएको एउटा उड्डयनसम्बन्धी पत्रिकाले समाचार प्रकाशन गरेको हो ।
विमान अवतरण गराउन विमानस्थल नजिक पुगेपछि इथियोपियाको आदिस अबाबा विमानस्थलका एअर ट्राफिकले सम्पर्क गर्ने प्रयास गरेका थिए । एभिएशन हेराल्डका अनुसार अन्ततः पाइलटहरू ब्युँझेर दोस्रोपटक विमानलाई अवतरण गराएका हुन् ।
विमान सोमबार सुडानको खार्तुम विमानस्थलबाट उडेको थियो । १५४ सीट क्षमताको उक्त बोइङ ७३७ विमानले दुई देशबीचको उक्त हवाई मार्गमा सामान्यतः दुई घण्टाभन्दा कम समय लगाउँछ ।
घटनापछि एक उड्डयन विश्लेषकले यस घटनालाई निकै चिन्ताजनक भन्दै ट्वीट गरेका छन् । ‘पाइलटहरू थकित हुने कुरा कुनै नयाँ होइन र यसले अन्तर्राष्ट्रिय रूपमा हवाई सुरक्षाका लागि सबैभन्दा ठूलो जोखिम देखाइरहेको छ,’ उड्डयन विश्लेषक एलेक्स मचेरसले ट्विटरमा लेखेका छन् । बिबिसीबाट
