२३ फेब्रुअरीमा युक्रेनमाथि अत्याचारपूर्ण आक्रमण थालेपछि रुसको तेल आयातमा युरोपेली मुलुकहरूले प्रतिबन्ध लगाएका छन्। अर्थतन्त्रको मुल खम्बा मानिने इन्धन निर्यात गर्न नपाएर छटपटाएको रुसले त्यसका लागि बलियो ग्राहक भेटेको छ, चीनलाई।
पछिल्ला दिनमा रुसले चीनलाई सबैभन्दा बढी इन्धन बिक्री गर्ने मुलुक बनेको छ। चीनमा गत मेमा रुसबाट खरिद गरिने इन्धनको हिस्सा ५५ प्रतिशतसम्म भएको छ। र, साउदी अरेबियालाई रुसले पछाडि पारेको छ।
कोरोना महामारीका कायम रहँदा इन्धनको माग पनि कम भएको चीनमा। त्यसका बावजुद चीनले रुसबाट तेल खरिद बढाएको छ। युक्रेनमाथि रुसी आक्रमण शुरु हुनुअघि गत फेब्रुअरीमा चिनियाँ राष्ट्रपति सी जिनपिङ र रुसका समकक्षी भ्लादिमिर पुटिनले आफ्नो दोस्तीको कुनै सीमा नभएको बताएका थिए।
त्यही सीमाहीन सम्बन्धको परिणामस्वरूप चिनियाँ कम्पनीहरूले रुसबाट कच्चा तेल (क्रुड आयल) आयात बढाएका छन्। त्यसमा चीनका दुई ठूला कम्पनी सिनोप्याक र सेनहुआ सहभागी छन्। अमेरिका र युरोपेली मुलुकले प्रतिबन्ध लगाएयता चिनियाँ कम्पनीहरूले रुसको तेल आयातमा भारी छूट दिएका छन्।
चिनियाँ भन्सार प्रशासनका अनुसार मे महिनामा रुसबाट ८४ लाख टन इन्धन आयात भएको छ। चीनमा दोस्रो निर्यातक बनेको साउदी अरेबियाबाट ७८ लाख टन इन्धन आयात भएको छ।
युक्रेनमाथि रुसको अत्याचारविरुद्ध अमेरिका र युरोपेली मुलुकले रुसी इन्धन आयातमा प्रतिबन्ध लगाएका छन्। यस्तो बेलामा रुसबाट इन्धन खरिद गर्नु भनेको रुसलाई रगत बगाउन पैसा दिएजस्तो हुने अमेरिका र युरोपेली मुलुकको ठम्याइ छ। रुसबाट इन्धन आयात बन्द हुँदा उसको अर्थतन्त्र थला पर्ने विश्लेषण उनीहरूको छ। तर, चीनले इन्धन खरिद बढाएर रुसको अर्थतन्त्रलाई टेवा दिएको छ।
