झापा- झापाका पत्रकार सन्तोष आचार्य उज्यालो नेपाल पार्टीमा प्रवेश गरेका छन्। पार्टी अध्यक्ष कुलमान घिसिङले सोमबार काठमाडौंमा आचार्यलाई पार्टीमा स्वागत गर्दै केन्द्रीय सदस्यको जिम्मेवारी दिएका हुन्।
राजनीति, सामाजिक गतिविधि तथा पत्रकारितामा लामो समयदेखि सक्रिय मेचीनगर-६ काँकरभिट्टा निवासी आचार्यले निरन्तरको छलफलपछि उज्यालो नेपाल पार्टीमा आबद्ध हुने निर्णय गरेको बताए। उनले आफ्नो राजनीतिक यात्रालाई नयाँ ढंगले अघि बढाउने उद्देश्यले उक्त पार्टी रोजेको बताएका छन्।
‘समृद्ध देश निर्माण र सामाजिक रूपान्तरणको अभियानमा उज्यालो नेपालमार्फत सक्रिय हुनेछु,’ आचार्यले भने, ‘यस अभियानमा सबैको सकारात्मक सहयोग, सुझाव र सल्लाहको अपेक्षा गरेको छु।’
दुई दशकभन्दा लामो समयदेखि पत्रकारितामा सक्रिय आचार्य प्रेस चौतारी नेपालका पूर्व केन्द्रीय सदस्य तथा नेपाल पत्रकार महासंघ झापा शाखाका पूर्व सचिव हुन्। उनी प्रेस क्लब मेचीनगरका संस्थापक अध्यक्षसमेत हुन्।
आचार्य यसअघि नेकपा एमालेको राजनीतिमा सक्रिय थिए। उनी एमालेको केन्द्रीय विभागका पूर्व सदस्यसमेत हुन्। पार्टी नेतृत्वको कार्यशैलीप्रति असन्तुष्टि जनाउँदै केही महिनाअघि एमाले परित्याग गरेको उनले बताएका थिए।
मेचीनगर क्षेत्रमा सामाजिक तथा राजनीतिक गतिविधिमा सक्रिय आचार्यको उज्यालो नेपाल प्रवेशलाई पार्टीले कोशी प्रदेश, विशेषगरी झापामा संगठन विस्तार र राजनीतिक गतिविधि अघि बढाउन महत्वपूर्ण रूपमा लिएको छ। पार्टीले उनलाई जिल्लामा संगठन निर्माण, विस्तार तथा रचनात्मक राजनीतिक गतिविधिलाई गति दिने जिम्मेवारीसमेत दिएको जनाइएको छ।
उज्यालो नेपाल पार्टीले पछिल्लो समय वैकल्पिक राजनीतिक शक्तिका रूपमा संगठन विस्तारलाई तीव्रता दिइरहेका बेला पत्रकारिता तथा सामाजिक क्षेत्रमा लामो अनुभव भएका आचार्यको प्रवेशलाई जिल्लामा पार्टीको गतिविधि विस्तारसँग जोडेर हेरिएको छ।