काठमाडौँ । नेकपा एमालेका अध्यक्ष केपी शर्मा ओलीले पार्टी छाडेर गएकाहरूलाई स्वागत नगर्ने बताएका छन् । विराटनगरमा पत्रकारसँग कुरा गर्दै उनले कार्यकर्ताहरूलाई पार्टी प्रवेशमा रोक नभए पनि स्पष्ट पारे ।

‘कार्यकर्ताहरूलाई पार्टी प्रवेशमा रोक लगाएका छैनौं, पार्टी छाडेर गएकाहरू पार्टी प्रवेश गर्न सक्नु हुन्छ,’ अध्यक्ष अ‍ोलीले भने, ‘तर, स्वागत गर्ने चलन छैन ।’

उनले आगामी १७ गते सत्ता गठबन्धनबारे आफूले गरेको भविष्यवाणीको लक्षण देखिन थालेको दाबी गरे । ‘पार्टीले निकालेका मन्त्रीलाई प्रधानमन्त्रीले कायम राखे, पार्टी निरीह भएर हेरेको छ, पार्टीले मन्त्री निकाल्यो, तर निक्लिएनन्, पार्टीको हालत यस्तो भइसक्यो,’ उनले भने ।

स्थानीय तहको निर्वाचनमा सिट संख्यामा एमाले दोस्रो भए पनि लोकप्रिय मतका आधारमा पहिलो भएको ओलीको भनाइ थियो । उनले आउँदो प्रतिनिधिसभा र प्रदेशसभाको चुनावमा देशबासीले अत्यधिक मतले एमालेलाई विजयी गराउने बताए ।