काठमाडौँ । पृथ्वी राजमार्गअन्तर्गत तनहुँको आँबुखैरेनी गाउँपालिका ४ ड्याम नजिक सडक भासिदा दुई जनाको मृत्यु भएकामध्ये एक जनाको सनाखत भएको छ ।

सडक भासिएर एक कार र एक मोटरसाइकलसँगै मस्र्याङ्दी नदी किनारमा दुई पुरुषको शव फेला परेको थियो । जिल्ला ट्राफिक कार्यालय तनहुँका अनुसार मृतकमध्ये एक जना गोरखाको सिरानचोक गाउँपालिकास्थित छोप्राकका केशव घिमिरे रहेका छन् ।

शुक्रबार बिहान ४ बजे भासिएको सडकबाट बा १० च ४६४९ नम्बरको कार र मोटरसाइकल खसेको थियो । मोटरसाइकलका चालक सवारी फालेर ज्यान जोगाएका थिए ।

सडक भासिँदा दुईतर्फी सवारी आवगमन अवरुद्ध भएको छ । पहिरोले सवारी जाम भएपछि यात्रु अलपत्र परेका छन् ।