डुकुछाप (ललितपुर)- गोदावरी नगरपालिका-८ डुकुछापमा एक वयस्क चितुवा बुधबार बिहानीपख खोरमा परेको छ।

यसअघि २ असोजमा एक चितुवा खोरमा परेको थियो, जसलाई वन डिभिजन ललितपुरको टोलीले उद्धार गरी जावलाखेलस्थित सदर चिडियाखाना लगेको थियो। बुधबार खोरमा परेको चितुवा माउ र २ असोजको चितुवा उसको डमरु भएको स्थानीय बासिन्दाको अनुमान छ।

डुकुछापको स्थानीय समुदाय र गोदावरी ८ नम्बर वडा कार्यालयको आग्रहमा वन डिभिजन कार्यालयले डुकुछापस्थित खहरे खोला नजिक चितुवा समात्न खोर राखेको छ। जसमा एक साताभित्रै दोस्रो चितुवा पसेको हो।

डुकुछापका स्थानीयवासी सुन्दर खड्काका अनुसार भदौ अन्तिम साता चितुवा पक्रिने उद्देश्यले उक्त खोर राखिएको थियो। “खोरमा धमाधम चितुवा पर्न थालेपछि हामी स्थानीय बासिन्दाले राहतको सास फेरेका छौं,” खड्काले भने, “गाउँमा सडक बत्ति पनि नभएकाले रात-साँझ हिँडडुल गर्न पनि त्रसित हुनुपर्छ। त्यसैले झाडी क्षेत्रमा बसिरहेका बाँकी चितुवा पनि खोरमा पारेर वन कार्यालयलाई बुझाउँछौं।”

गोदावरी-८ का डुकुछाप र टोकलमार्टबीचमा लामो समयदेखि ५ वटा सम्म चितुवा देखिँदै आएका छन्। सरसफाइ अभावमा उक्त क्षेत्र झाडीमा परिणत भएको छ। सोही झाडीलाई चितुवाले वासस्थान बनाउँदै आएका छन्।

स्थानीय बासिन्दाका अनुसार उक्त क्षेत्रको जमिन यसअघि नै बिक्री भइसकेको छ। जसले जमिन खरिद गरेका छन्, उनीहरूले त्यस क्षेत्रमा हुर्किएको झाडी फाँड्न चासो दिएका छैनन्। र, सोही झाडीलाई चितुवाले बासस्थान बनाएका छन्।

चितुवाहरू दिउँसै पनि आहाराको खोजीमा बस्ति नजिक र खेतबारीमा देखिने गर्छन्। पछिल्लो समय मानिसलाई आक्रमण गरेका छैनन् तर स्थानीयवासीले पालेका खसी-बाख्रा खोरबाटै तानेर खाइदिने गरेका छन्।