काठमाडौँ- नेपालका लागि पाकिस्तानी राजदूत मोहम्मद आमिर खानले राष्ट्रिय समाचार समिति (रासस) का कर्मचारीको परिवारसँग भेटघाट गर्नुका साथै बाढीबाट प्रभावित पत्रकार कालिका खड्काप्रति समवेदना व्यक्त गरेका छन्।

भद्रकालीस्थित राससको केन्द्रीय कार्यालयको भ्रमण गरेका राजदूत खानले रासस कर्मचारी खड्काका पति तथा पत्रकार टेकराज थामी भोटेकोशीको बाढीमा परी बेपत्ता भएको घटनाप्रति दुःख व्यक्त गरे। उनले भने, “बाढीका कारण नेपाल, रासस र पत्रकार खड्काको परिवार पीडामा हुनुहुन्छ। म यस कठिन परिस्थितिमा धैर्य र संयम अपनाउन आग्रह गर्दछु।”

राजदूत खानले पत्रकार थामी बेपत्ता भएको घटनाप्रति दुःख व्यक्त गरे। खड्काको पारिवारिक अवस्थाबारे जानकारी लिँदै उनले आवश्यक सहयोग उपलब्ध गराउन आफू तयार रहेको बताउनुभयो। यस क्रममा राजदूत खानले नेपाल र पाकिस्तानबीच ऐतिहासिक तथा पारिवारिक सम्बन्ध रहेको र शैक्षिक क्षेत्रमा पनि सम्बन्ध सुदृढ रहेको उल्लेख गरे।

धेरै नेपाली युवाले पाकिस्तानमा छात्रवृत्ति पाइरहेको जानकारी दिँदै राजदूत खानले खड्काकी छोरीलाई शैक्षिक सहयोग उपलब्ध गराउने प्रतिबद्धता व्यक्त गरे। खड्काप्रति सहानुभूति प्रकट गर्दै राजदूत खानले भने, “म आफूलाई नेपाली परिवारको सदस्यजस्तै महसुस गर्छु; आवश्यक परेमा हामी तपाईंकी छोरीको शिक्षामा सहयोग गर्नेछौँ।”

भ्रमणका क्रममा राजदूत खानले रासस संग्रहालयको अवलोकन गरे र पत्रकारिताको क्षेत्रमा राससको योगदान अतुलनीय रहेको बताए।

नेपाल र पाकिस्तानबीच सांस्कृतिक सम्पदाको क्षेत्रमा पनि गहिरो अन्तरसम्बन्ध रहेको उल्लेख गर्दै उनले रासससँग सहकार्य गर्ने इच्छा व्यक्त गरे।