काठमाडौं- वरिष्ठ पत्रकार किशोर श्रेष्ठलाई रिहा गर्न सर्वोच्च अदालतले आदेश दिएको छ।
आज न्यायाधीशद्वय नहकुल सुवेदी र बालकृष्ण ढकालको इजलासले उनलाई हाजिरी जमानीमा छाड्न आदेश दिएको हो।
सर्वोच्चले जिल्ला प्रहरी परिसर काठमाडौंको नाममा परमादेश जारी गरेको हो।
निवेदकका विरूद्ध परेको जाहेरीका आधारमा मुलुकी फौजदारी कार्यविधि संहिता, २०७४ को दफा ९ बमोजिम काठमाडौं जिल्ला अदालतबाट पक्राउ अनुमति लिई, ऐ. दफा १४ बमोजिम म्याद थप गरेर अनुसन्धान अघि बढाइएको देखिएकाले उक्त थुनालाई गैरकानूनी भन्न नमिल्ने ठहर अदालतको छ।
सोही आधारमा सर्वोच्चले निवेदनबमोजिम बन्दी प्रत्यक्षीकरणको आदेश जारी गर्न भने अस्वीकार गरेको छ।
सर्वोच्चले पत्रकार श्रेष्ठको घर र कार्यालयबाट प्रहरीले बरामद गरेका सबै सामान फिर्ता गर्न पनि आदेश दिएको छ।
निवेदक सञ्चार संस्थासँग सम्बद्ध रहेको एवं नेपालको संविधानअनुसार सञ्चारमाध्यमका सञ्चार सामग्री जफत गर्न र सञ्चारमाध्यम अवरुद्ध गर्न नपाइने उल्लेख रहेको आदेशमा स्पष्ट गरिएको छ।