इस्लामाबाद- पाकिस्तानको राजधानी इस्लामाबादमा रहेको एक कथित ‘स्क्याम कल सेन्टर’ मा छापा मार्दा अवैध कार्य गर्ने २५८ विदेशीलाई पक्राउ गरिएको अधिकारीहरूले सोमबार बताएका छन् । पक्रउ पर्नेमा करिब ४० जना चिनियाँ नागरिक समेत रहेको बताइएको छ ।
“उनीहरू इस्लामाबादको बाहिरी क्षेत्र गुलबर्ग ग्रीन नामक आवासीय क्षेत्रमा स्क्याम कल सेन्टर सञ्चालन गर्दै थिए,” पाकिस्तानी सङ्घीय गुप्तचर सेवा तथा अनुसन्धान निकायका एक अधिकारीले एएफपीसँग भन्नुभयो ।
उहाँले भन्नुभयो, “उनीहरू पर्यटक भिसामा पाकिस्तान आएका थिए र उनीहरूले जे गरिरहेका थिए त्यो गर्न उनीहरूलाई अनुमति थिएन।”
पक्राउ परेकाहरूमध्ये भियतनामका १७० जनासहित मलेसिया र अन्य देशका नागरिकहरू छन् । उनीहरूलाई रावलपिण्डी जेलमा राखिएको छ ।
अधिकारीले भनेका छन्, “सम्बन्धित दूतावासहरूलाई जानकारी दिइएको छ र अनुसन्धान जारी रहेकाले पक्राउ परेकाहरूविरुद्धका आरोपका विवरण आउँदा दिनहरूमा सार्वजनिक गरिनेछ ।”
सम्भावित परिणामहरूमा संलग्न व्यक्तिहरूलाई देश छोड्न निर्देशन गर्ने घोषणसम्म पनि समावेश हुन सक्ने अधिकारीले थपे।
मिडिया रिपोर्टहरू अनुसार विदेशीहरूलाई गत साता पक्राउ गरिएको थियो।
एएफपीले यी पक्राउबारे टिप्पणी माग्दै चिनियाँ विदेश मन्त्रालयलाई सम्पर्क गरेको छ।
सन् २०२५ जुलाईमा पनि यस्तै छापा मारिएको थियो जसमा ‘पन्जी स्किम र लगानी ठगीसँग सम्बन्धित ठूलो कल सेन्टर’ मा काम गरेको आरोपमा अधिकांश चिनियाँसहित ७१ विदेशी गरी १४९ जना पक्राउ परेका थिए ।