पाकिस्तान- पाकिस्तानको खैबर पख्तुनख्वा प्रान्तको स्वात जिल्लाको कबाल प्रकरी चौकी नजिकै भएको आत्मघाती बम विस्फोटमा सात जना प्रहरीसहित १७ जनाको मृत्यु हुनुका साथै अन्य २७ जना घाइते भएको जनाइएको छ ।
पाकिस्तानी पत्रिका डनका अनुसार स्वात प्रहरी प्रवक्ता नासिर इकबाल करीमीले आइतबारको आक्रमणमा १० जना सर्वसाधारण र सात जना प्रहरी कर्मचारीको मृत्यु हुनुका साथै १८ जना प्रहरी र नौ जना सर्वसाधारण घाइते भएको जानकारी दिँदै हताहतको सूची सार्वजनिक गर्नुभएको छ ।
नजिकैको काबुल चोकमा कानुन र कानुनी व्यवस्थाको विरोधमा सार्वजनिक विरोध प्रदर्शन भइरहेको समयमा काबुल प्रहरी स्टेसन नजिकै आत्मघाती बम विस्फोट भएको बताइएको छ । स्वात प्रहरीका अनुसार प्रहरी कर्मचारीहरूले प्रहरी स्टेसनको प्रवेशद्वारमा उनीहरुलाई रोक्ने प्रयास गरेपछि आक्रमणकारीले विस्फोटक पदार्थ विस्फोट गरेको डनले जनाएको छ ।
विस्फोटलगत्तै ठूलो मात्रामा उद्धार अभियान सुरु गरिएको बताइएको छ । उद्धार अभियानमा ५० जनाभन्दा बढी उद्धारकर्मी संलग्न रहेको जनाइएको छ । उद्धार टोलीहरूले घाइतेहरूलाई उपचारका लागि विभिन्न अस्पतालमा लैजानुअघि घटनास्थलमा प्राथमिक उपचार गरेको जनाइएको छ भने राहत तथा आक्रमणको अनुसन्धान जारी रहेको डनले जनाएको छ ।
आक्रमणमा मृत्यु भएका प्रहरीलाइ प्रहरी टोलीले गार्ड अफ अनर प्रदान गरेपछि अन्त्येष्टि सम्पन्न भएको अखबारले जनाएको छ ।
स्वात उपत्यकामा आतङ्कवादको पुनरुत्थानको विरोधमा भएको सार्वजनिक प्रदर्शनका क्रममा बम विस्फोट भएको थियो । त्यहाँ बासिन्दाहरू सुरक्षा पुनःस्थापना गर्न अधिकारीहरूबाट कडा कारबाहीको माग गर्न भेला भएका थिए ।
अहिलेसम्म कुनै पनि समूहले आक्रमणको जिम्मेवारी लिएको छैन ।
पछिल्लो समयमा पाकिस्तानमा आतङ्कवादी हिंसामा वृद्धि हुँदै जाँदा यो घटना भएको जनाइएको छ । पाकिस्तान इन्स्टिच्युट फर कन्फ्लिक्ट एन्ड सेक्युरिटी स्टडीजको तथ्याङ्कलाई उद्धृत गर्दै खैबर पख्तुनख्वामा जुलाई महिनामा आतङ्कवादसँग सम्बन्धित घटनामा १५४ जनाको मृत्यु भएको जनाइएको छ ।