झापा- बिर्तामोड नगरपालिका–८ स्थित देउनिया खोलामा स्थानीयवासीको सक्रियता र पुराणबाट सङ्कलित रकमको सहयोगमा निर्माण गरिएको देउनिया विश्रान्तिघाट अन्तिम चरणमा पुगेको छ । घाटलाई थप आकर्षक बनाउन शनिबार उक्त क्षेत्र परिसरमा बृहत् सरसफाइ गरिएको छ ।
देउनिया विश्रान्तिघाट निर्माण समितिको अगुवाइ तथा बिर्तामोड–८ वडा कार्यालयको समन्वयमा गरिएको सरसफाइ कार्यक्रममा जनप्रतिनिधि, निर्माण समितिका पदाधिकारी, सुरक्षाकर्मी र स्थानीयवासीको सहभागिता थियो । घाट परिसरमा फूलबारी र फलफूलका बिरुवा रोप्ने तयारीस्वरूप सरसफाइ गरिएको हो ।
करिब रु ३५ लाखको लागतमा निर्माण सम्पन्न भएको विश्रान्तिघाटका लागि अन्य सरकारी निकायको पनि आर्थिक सहयोग रहेको छ । जसमा कोशी प्रदेश सरकारबाट रु आठ लाख, बिर्तामोड–८ वडा कार्यालयबाट रु १० लाख बजेट विनियोजन भएको थियो । त्यस्तै गत वर्ष जेठमा लगाइएको धार्मिक पुराणबाट रु नौ लाख ३८ हजार सङ्कलन भएको थियो । बाँकी रकम विभिन्न दाताले सहयोग गरेका थिए ।
निर्माण समितिका सचिव मदन अधिकारीले समुदायको साथबिना यो काम सम्भव नभएको बताउनुभयो । उहाँले भन्नुभयो, “पुराणबाट उठेको रकम, स्थानीयवासीको सहयोग र विभिन्न दाताको साथले विश्रान्तिघाट निर्माण सम्पन्न गर्न सफल भएका छौँ । अब उद्घाटनसँगै यसलाई व्यवस्थित र हरियालीयुक्तस्थलका रूपमा विकास गर्ने तयारी गरेका छौँ ।”
बिर्तामोड–८ का वडाध्यक्ष अजय कार्कीले घाट निर्माणसँगै स्थानीयले वर्षौँदेखि भोग्दै आएको शवदाहस्थलको समस्या समाधान भएको बताउनुभयो । “वर्षायाममा देउनिया खोलामा आउने बाढीका कारण शवदाह गर्न कठिन हुने र शव नै बग्ने जोखिम थियो । नयाँ विश्रान्तिघाट बनेपछि त्यो समस्या अन्त्य भएको छ”, उहाँले भन्नुभयो ।
वडाध्यक्ष कार्कीका अनुसार अब घाट परिसरको सौन्दर्यकरणमा जोड दिइएको छ । उद्यान निर्माणको अवधारणाअनुसार फूलबारी र फलफूलका बिरुवा रोपेर क्षेत्रलाई हरियालीयुक्त बनाइनेछ । घाट निर्माणमा पशुपतिनाथ क्षेत्रबाट ल्याइएको नफुट्ने प्रकृतिको ढुङ्गा प्रयोग गरिएकाले संरचना दीर्घकालीन र मजबुत बनेको उहाँले जानकारी दिनुभयो ।
विश्रान्तिघाट रहेको क्षेत्रमा सिँचाइ डिभिजन कार्यालयले रु २५ लाखको लागतमा तटबन्ध निर्माण गरिसकेको छ भने जनताको तटबन्ध कार्यालयबाट थप रु २१ लाख तटबन्धका लागि विनियोजन भएको निर्माण समितिले जनाएको छ । समितिका अनुसार विश्रान्तिघाटको उद्घाटन यही साउन महिनाभित्रै गरिने तयारी छ ।