उत्तरकोरियाले पहिलोपटक मुलुकमा कोरोना संक्रमणको जानकारी सार्वजनिक गरेको छ। संक्रमण पुष्टि भएको उल्लेख गर्दै देशव्यापी लकडाउन लागू गरेको छ।

उत्तरकोरियाको सरकारी सञ्चार माध्यम केसीएनएका अनुसार राजधानी प्योङयाङमा ओमिक्रोन भेरियन्टको संक्रमण भएका बिरामी फेला परेका हुन्। तर, त्यसबाट कति मानिस संक्रमित भएका छन् भन्ने खुलाइएको छैन।

‘यो सबैभन्दा ठूलो संकट हो, जसले देशको क्वारेन्टिन नियमलाई असफल सावित गरिदिएको छ,’ केसीएनएले लेखेको छ, ‘देशका सर्वोच्च नेता किम जोङ–उनले उच्च सरकारी अधिकारीहरूसँग आपतकालीन बैठक गरिरहेका छन्। र, देशलाई महामारीबाट बचाउने उपायको खोजी थालेका छन्।’

अहिले आएर देशव्यापी लकडाउन घोषणा गरेको उत्तरकोरियामा यसअघि पनि कोरोना संक्रमित भेटिएको आशंका थियो। उत्तरकोरियाले कोभिड खोप अभियान अहिलेसम्म सञ्चालन गरेको छैन। चीनमा निर्मित खोप सिनोभ्याक्स र रुसमा बनेको एस्ट्रेजेनेका खरिद गर्न पनि अस्वीकार गरेको थियो।

देशका सीमा बन्द राखेपछि महामारीबाट टाढा रहन सकिने बुझाइमा उत्तरकोरियाली अधिकारीहरू रहँदै आएका थिए। तर, लामो समय सीमा पूर्ण बन्द राख्दा भोकमरीको सामना गर्नु परेको थियो।

छिमेकी मुलुकहरू चीन र दक्षिण कोरियामा कोरोना महामारीको कहर रहँदा उत्तरकोरिया अछुतो नरहेको विश्लेषण गरिँदै आएको थियो। तर, सरकारले महामारी प्रवेश गरे–नगरेको स्पष्ट बताएको थिएन।