काठमाडौँ । नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले नेपाली कांग्रेसबाट धोका हुने आशंका राखेका छन् । उनले गठबन्धनभित्र कांग्रेसबाट धोका हुने आशंका गरेका हुन् ।
कैलारी गाउँपालिकाको हसुलिया बजारमा आगामी वैशाख ३० गते हुने स्थानीय निर्वाचनका लागि आयोजना भएको चुनावी सभालाई सम्बोधन गर्दै प्रचण्डले गठबन्धनभित्र सहमतिविपरीत कांग्रेसले उम्मेदवारी दिन लगाएर धोका दिन खोजेको बताएका हुन् ।
गठबन्धन गर्नु भनेको झुक्ने नभएको बताउँदै प्रचण्डले धेरै स्थानमा गठबन्धन ‘क्लियर’ नभएको दाबी गरे । ‘बेइमानी र षड्यन्त्र स्वीकार्य हुँदैन‚ कांग्रेसले यहाँ पनि गठबन्धनको सहमतिविपरीत उम्मेदवारी दिएको छ, त्यसलाई खारेज नगर्ने हो भने हामी एक्लै चुनाव लड्नु पर्छ, यो अवस्थामा हाम्रोतर्फबाट उपाध्यक्ष पदमा परेको उम्मेदवारलाई जिताउनु पर्छ, गठबन्धन गर्नुको अर्थ झुक्नु होइन,’ उले भने ।
कैलारी गाउँपालिकामा गठबन्धनको सहमतिअनुसार माओवादीलाई अध्यक्ष र उपाध्यक्षमा कांग्रेसका उम्मेदवार हुने थियो । तर‚ सहमतिअगावै कांग्रेसबाट टिकट पाइसकेका रामसमज चौधरीले अध्यक्ष पदमा उम्मेदवारी दिएका थिए ।
कांग्रेसको उम्मेदवारीपछि उपाध्यक्षमा माओवादीकी लक्ष्मी सत्वगौवा चौधरीले पनि उम्मेदवारी दिएकी छन् । उनले पनि अहिलेसम्म उम्मेदवारी फिर्ता लिएकी छैन ।