काठमाडौँ । चिनियाँ सहर सांघाईमा लकडाउन लागू भएपछि पहिलोपटक कोरोना भाइरस संक्रमणबाट तीन जनाको मृत्यु भएको छ । सांघाईको स्वास्थ्य आयोगले सोमबार सो जानकारी दिएको हो । मृतकको उमेर ८९ देखि ९१ वर्षको बीचमा रहेको र तिनले खोप नपाएको बताएको छ ।

 

चीनले सांघाईमा कोरोनाबाट कसैको ज्यान नगएको दाबी गरिरहेको थियो । तर, उसको दाबीमाथि प्रश्न उठेको छ । चीन सरकारले सोमबार पुष्टि गरेको तीन जनाको मृत्यु मार्च २०२० पछि पूरै देशमा सरकारले कोरोनाबाट कसैको मृत्यु भएको स्वीकारेको पहिलोपटक हो ।

रेकर्ड स्तरको बेरोजगारी

चीनको अर्थतन्त्रसम्बन्धि नयाँ तथ्याङ्कले लकडाउनका कारण जनताको खर्चमा कमी आएको र महामारीको प्रारम्भिक चरणदेखि नै बेरोजगारी बढेको देखाएको छ । मार्च महिनादेखि चीनमा कोरोना संक्रमण निकै बढेको छ ।

 

कोरोना संक्रमणको विस्तार रोक्न चीनले धेरै सहरमा लकडाउन गरेको छ । चीनको वित्तीय, उत्पादन र ढुवानी हब मानिने सांघाईमा समेत कडा लकडाउन लागु गरिएको छ । चीनको नेशनल ब्युरो अफ स्ट्याटिस्टिक्सले जारी गरेको तथ्यांकअनुसार मार्चमा खुद्रा बिक्री दर ३.५ प्रतिशतले घटेको छ । सन् २०२० को जुलाईपछि पहिलोपटक यसमा गिरावट आएको हो ।

 

सोही अवधिमा बेरोजगारी दर बढेर ५.८ प्रतिशत पुगेको छ । यो सन् २०२० को मेयताकै उच्च हो । यी तथ्याङ्कहरूले आगामी महिनामा चिनियाँ अर्थतन्त्रमा तीव्र गिरावट आउन सक्ने सङ्केत गर्ने विज्ञहरुको भनाइ छ ।

 

चीनमा लागू गरिएको कठोर लकडाउनका अतिरिक्त युक्रेनमा जारी युद्धले पनि उसको अर्थतन्त्रलाई प्रभावित बनाउने छ ।

उत्साहप्रद तथ्यांक, भविष्यप्रति निराशा

 

अर्कोतर्फ पहिलो त्रैमासिकमा चीनले उसको कूल ग्राहस्था उत्पादनमा अघिल्लो वर्षको तुलनामा ४.८ प्रतिशतको वृद्धि हासिल गरेको छ । जुन विभिन्न विश्लेषकको भविष्यवाणीभन्दा बढी हो । तर, यो चीनले तोकेको लक्ष्यभन्दा कम हो । चीनले यो वर्ष ५.५ प्रतिशतको आर्थिक वृद्धिदर हासिल गर्ने लक्ष्य राखेको थियो ।

 

कोरोनाको नयाँ भेरियन्ट ओमिक्रोन फेला परेपछि तीन साताअघिबाट सांघाईमा कडा लकडाउन गरिएको छ । लकडाउनप्रति स्थानीय बासिन्दा चर्को आक्रोश छ । त्यहाँ लाखौं मानिस घरमै थुनिएका छन् । र, पोजेटिभ देखिएकालाई जबरजस्ती क्वारेन्टाइनमा पठाइँदै छ ।

 

लकडाउनका कारण खाद्य वस्तु उपलब्ध नभएको जनगुनासो छ । जनताले खाना र पानी अर्डर गर्नु पर्ने र तरकारी, मासु र अण्डाका लागि सरकारी आपूर्तिमा भर पर्नुपर्ने अवस्था छ । तीमध्ये अधिकांश स्थानमा सामानको अभाव पनि रहेको विश्लेषकहरू बताउँछन् ।

 

सांघाईमा अहिले दैनिक २० हजारभन्दा बढी नयाँ कोरोना संक्रमित भेटिइरहेका छन् । प्रदर्शनी हल र स्कुललाई क्वारेन्टाइन केन्द्रमा रूपान्तरण गरेका छन् । र, तीव्र रुपमा अस्थायी अस्पताल निर्माण भइरहेका छन् । तीन हप्तादेखि लकडाउन भएको सांघाईमा ठूलो मात्रामा परीक्षण फेरि सुरु हुँदै छ । लगातार चौथो साता लकडाउन हुने सम्भावना अधिक छ ।

 

चीनमा कोरोना संक्रमितको संख्या तुलनात्मक रुपमा अन्य देशको तुलनामा न्यून देखिन्छ । तर, चीनले कोभिड–१९ को शून्य नीति अवलम्बन गरेकाले महामारी रोक्न गरिएका लकडाउन र प्रतिबन्धहरूले आर्थिक क्षेत्रमा चुनौती देखिएको हो ।
बीबीसी