काठमाडौँ । श्रीलंका स्वतन्त्र भएयताकै सबैभन्दा गम्भिर मोडमा पुगेको छ । ठूलो व्यापार घाटा र उच्च वैदेशिक ऋण भुक्तानीका कारण देशको विदेशी मुद्रा सञ्चितिमा भारी गिरावट आएको छ । जसका कारण उसले चाहिएजति खाद्यान्न र औषधीसमेत किन्न सकिरहेको छैन ।
खनिज इन्धनबाट चल्ने विद्युत गृह इन्धनको अभावले ठप्प भएका छन् । जसले गर्दा लोडसेडिङ शुरु भएको छ । लोडसेडिङ हुने अवधि दिनप्रतिदिन बढिरहको छ ।
खाद्यान्न, बिजुलीलगायत अत्यावश्यक सामानमा चरम अभाव भएपछि मानिसहरू सरकारको विरोध गर्न सडकमा उत्रिएका छन् । अहिलेको संकटका लागि वर्तमान राष्ट्रपति गोटावाया राजापाक्षलाई विशेष जिम्मेवार भएको भन्दै उनको राजिनामाको माग चर्किदै गएको छ । तर, राजापाक्ष राजिनामा दिने पक्षमा छैनन् ।
मन्त्रिपरिषद्का अधिकांश सदस्यले भने राजिनामा दिइसकेका छन् । गोटावायाका दाइ तथा पूर्व राष्ट्रपति महिन्द्रा राजापाक्षले प्रधानमन्त्री पदबाट राजिनामा दिएका छैनन् ।
श्रीलंका अहिले आर्थिक र त्यसबाट सिर्जित राजनीतिक संकटबाट जुग्रिरहेको छ । अहिलेको आर्थिक संकटबाट बाहिरिन श्रीलंकाले आईएमएफसँग उद्दार प्याकेजमा छलफल अगाडि बढाइरहेको छ । आईएमएफसँग वार्ता चलिरहेकै बेला श्रीलंकाले विदेशी ऋणको भुक्तानीको पछिल्लो किस्ता तिर्न सकेन ।
खाद्यान्न र इन्धनपछि अहिले श्रीलंकामा चिकित्सकीय सामाग्रीको अभाव हुन थालेको छ । चिकित्सकीय औषधी र उपकरणको अभावले श्रीलंकामा ‘विगतमा कहिले नदेखिएको स्तरको मानवीय संकट’ सिर्जना भएको सिंगापुर रेड क्रसले बताएको छ ।
डक्टरहरूले चिकित्सकीय उपकरणको अभावका कारण एकपटक प्रयोग पछि फालिने क्याथेटरजस्ता सामाग्रीहरू पुनः प्रयोग गरिरहेको बताएका छन् । अस्पतालमा समेत बिजुली काटिन थालेपछि मोबाइल फोन बालेर शल्यक्रिया भइरहेको चिकित्सकले बताएका छन् ।
अधिकारीहरूले हालसम्म चिकित्सकीय अभावले कसैको मृत्यु भएको पुष्टि नभएको बताएका छन् । तथापि, विज्ञहरूले अहिलेको संकटका कारण देशमा कोभिडबाट मर्नेको संख्या बढ्ने चेतावनी दिएका छन् ।
‘अहिलेके संकट थप कति खराब स्थितिसम्म पुग्छ भनेर अहिले भन्न सकिने अवस्था छैन । तर, अहिले हामी संकट चुलिदै जाने स्थितिमै छौँ र दिनप्रतिदिन स्थिति खराब बन्दै गएको,’ श्रीलंकाको औषधी निर्माताहरूको संघकी सचिव आथुला अमरासेनाले भनिन् ।
सीएनएनबाट
