बेइजिङले कोरोना भाइरस (कोभिड–१९)बाट प्रभावित व्यवसायका लागि अनुदान कार्यक्रम बढाएको छ । तीव्र गतिमा सर्ने ओमिक्रोन भेरियण्ट चीनको ३१ मध्ये २८ प्रान्तमा फैलिसकेको छ ।
चीन उसको पुरानै ‘शून्य कोभिड रणनीति’मा अडिग छ । त्यसको कार्यन्वयनका लागि देशभर विशाल क्षेत्रमा लकडाउन गरिएको छ । लकडाउन लगाएका ठाउँमा सबैको परीक्षण पनि तीव्रताका साथ अघि बढाइएको छ ।
यी नियन्त्रण प्रयास कार्यन्वयन गर्दा धेरै व्यवसायी मारमा परेका छन् । तिनको सहयोगका लागि चीनले ३९३ अर्ब डलरको कर छुटको योजना अघि सारकोे छ । त्यसबाहेक भाडा छुट, ऋणमा सहयोगजस्ता सहयोगका कार्यक्रम लागु गरिने प्रशासनले बताएको छ ।
हालसम्म सार्वजनिक सहायता प्याकेज
चीनका प्रधानमन्त्री ली खछङले मार्चको सुरुमा आयोजित ‘टु सेसन’मा २५ खर्ब युवानको कर छुट प्याकेज घोषणा गरे । गत वर्ष सरकारले ११ खर्ब युवानको कर छुट प्याकेज घोषणा गरेको थियो । यसपटक त्योभन्दा ठूलो प्याकेज ल्याएको छ ।
चीन सरकारले कोरोनाबाट प्रभावित व्यवसायीको सहयोगमा अघि सारेको सहायता प्याकेजमा निम्न कुराहरु समेटिएको छ :
– साना व्यवसायीहरूले अझै मुल्य अभिवृद्धि कर तिर्नु पर्ने छैन । यो व्यवस्था एक लाख ५० हजार युवानभन्दा कम मासिक बिक्री आय हुनेका लागि लागु हुनेछ ।
– वार्षिक भुक्तानी १० लाखदेखि ३० लाख युवानबीचमा छ भने आय कर आधा गरिनेछ ।
– १५ खर्ब युआन बराबरको मूल्य अभिवृद्धि कर यो वर्ष रिफण्ड गरिने योजना छ ।
– स्थानीय सरकारलाई विशेष छुट दिन प्रोत्साहित गरिने छ ।
– इन्टरनेट प्ल्याटफर्मसम्बन्धी कम्पनीलाई तिनको प्ल्याटफर्ममा निर्भर साना व्यवसायीहरूको खर्च कम गर्न प्रोत्साहित गरिने छ ।
– विभिन्न शूल्यलगायत अन्य प्रशासनिक शूल्क घटाइने छ । यसमा सरकार समर्थित व्यापारिक संस्था तथा बन्दरगाह व्यवस्थापन शूल्क पनि पर्छ ।
सरकारी सम्पत्ति सुपरिवेक्षण र प्रशासनिक अयोगले मार्चमा एक घोषणा गर्दै केन्द्रीय सरकारको स्वामित्वमा रहेको संस्थाका अफिस भाडामा लिएका साना व्यवसायी र स्वरोजगार व्यवसायहरूलाई तीन महिना भाडा छुटको व्यवस्था गरेको छ । कोभिडको बढी जोखिम क्षेत्रमा रहेका व्यवसायलाई ६ महिनासम्म भाडा छुट दिन सकिने व्यवस्था गरेको छ ।
कोरोना सहायतासम्बन्धी अधिकांश कार्यक्रमले साना व्यवसायी र स्वरोजगार व्यवसायीलाई लक्षित गरेको छ । यसले बेइजिङले देशको स्थायित्वलाई कति महत्व दिएको छ भन्ने खुल्छ । चिनियाँ सरकार कोरोना विस्तार रोक्न उठाइएका कदमले आर्थिक वृद्धिमा असर नपुगोस् भन्नेमा निकै सचेत देखिन्छ ।
जनवरी–फेब्रुअरीको वृद्धिको तथ्यांक राम्रो भए पनि पछिल्लो समय ओमिक्रोन भेरियण्टको विस्तार रोक्न कठोर कदम उठाइयो । रुस–युक्रेन युद्धले उपभोग्य सामानको मूल्य वृद्धि हुँदा त्यसको असर आर्थिक वृद्धिमा हुने देखिन्छ ।
केही विज्ञले चीनको शून्य कोभिड नीतिमै समस्या रहेको बताइरहेका छन् । यसरी एक जनामा पनि कोभिड लाग्दा सम्पूर्ण अर्थतन्त्र बन्द गर्न थालियो भने समग्र अर्थतन्त्र कहिले चलायमान हुन नसक्ने तिनको विश्लेषण रहँदै आएको छ ।
केही वर्षदेखि चीनको आर्थिक वृद्धिमा केही सुस्तता आउन थालिसकेको स्थितिमा ओमिक्रोनविरुद्धको कठोर नीतिले त्यसमा थप असर पार्ने देखिन्छ ।
एक अध्ययनले पछिल्लो ओमिक्रोन भेरियण्टको महामारी र त्यसलाई नियन्त्रण गर्न उठाइएका कदमले चीनको कूल घरेलु उत्पादनमा १.८ प्रतिशतको क्षति पुर्याउने आकलन छ ।
सरकारले थप सहायता नीति ल्याउला ?
बेइजिङले घोषणा भइसकेका सहायता कार्यक्रमहरू शीर्घ कार्यन्वयनमा ल्याउन आह्वान गरेको छ । उसले वृद्धिमा सघाउने नीति सकेसम्म छिटो सार्वजनिक गर्ने बताएको छ ।
अप्रिल ६ मा भएको एक बैठकले कोरोनाबाट सबैभन्दा बढी प्रभावित क्याटरिङ, खुद्रा, पर्यटन र उड्यन व्यवसायले दोस्रो चौमासमा कर्मचारीलाई दिने पेन्सन योगदान पछिलाई सार्न सक्ने बताएको छ ।
साथै सोही बैठकले साना तथा मध्य स्तरका व्यवसायले चाहेमा रोजगारी कटौती गर्ने अनुमति पनि दिएको छ । यीबाहेक बैंकहरूको सहुलियत कर्जालगायत अन्य सम्भावित कदमबारे बहस भइरहेको अधिकारीले बताए।
साउथ चाइना मनिङ पोष्टबाट
