पाकिस्तानको राष्ट्रिय सभामा आज प्रधानमन्त्री इमरान खानविरुद्ध ल्याइएको अविश्वासको प्रस्तावमाथि मतदान गर्ने पूर्व योजना थियो।
तर, राष्ट्रिय सभाको आजको सत्रको अध्यक्षता गरेका उपसभामुख कासिम सुरीले ल्याइएको अविश्वासको प्रस्ताव नै खारेज गरिदिए। सुरीले सो प्रस्ताव पाकिस्तानको संविधानको धारा ५ सँग बाझिएको भन्दै खारेज गरिदिएका थिए।
पाकिस्तानी प्रमुख समाचारपत्र डनका अनुसार त्यहाँको संविधानको धारा ५ मा राज्यप्रतिको निष्ठा प्रत्येक नागरिकको प्रमुख कर्तव्य हो भनेको छ।
इमरान खान सरकारले पहिलेदेखि आफूहरुविरुद्ध ल्याइएको अविश्वासको प्रस्ताव ‘विदेशीहरुको लगानीमा अघि बढाइएको षडयन्त्र’ भएको बताउदै आएको थियो।
इमरान खानले आफूलाई हटाउन एउटा विदेशी मुलुकले पाकिस्तानको दुवतासमार्फत धम्कीपूर्ण पत्र पठाएको पनि बताएका थिए।
अविश्वासको स्ताव खारेज भएपछि देशको नाममा सम्बोधन गर्दै खानले अविश्वासको प्रस्ताव खारेज भएकोमा देशबासीलाई बधाई दिए। उपसभामुखले ‘सत्ता परिवर्तन तथा विदेशी षडयन्त्रलाई असफल’ बनाइदिएको खानले टिप्पणी गरे।
पाकिस्तानको संविधानको धारा ५८ ले प्रधानमन्त्रीले सिफारिस गरेमा राष्ट्रपतिले राष्ट्रिय सभा भंग गर्नुपर्ने उल्लेख गरेको छ।
देशवासीको नाममा गरिएको सम्बोधनमा खानले आफूले राष्ट्रपति सामु राष्ट्रिय सभा भंग गर्ने लिखित सुझाव पेस गरेको बताएका छन्।
‘अब चुनावको तयारी सुरु गर्नुहोस्। देशको भविष्य के हुने भन्ने निर्णय गर्ने अधिकार कुनै भ्रष्ट शक्तिसँग हुनु हुदैन। संसद विघटन भएसँगै आगामी चुनावको प्रक्रिया सुरु भएको छ र अहिलेको सरकार कार्यवाहक सरकारमा बदलिएको छ,’ इमरानले सम्बोधनमा भने।
३४२ सदस्यीय नेसनल एसेम्ब्लीमा बहुमतका लागि १७२ सांसद चाहिन्छ । खानको पाकिस्तान तेहरिक–ए इन्साफ पार्टीका १३३ सांसदमात्रै छन्। खानले अन्य दलसँग मिलेर गठबन्धन सरकार चलाईरहेका थिए। पछिल्लो समय गठबन्धनका केही दलले उनलाई दिएको समर्थन फिर्ता लिएका थिए।
विपक्षी सांसदहरूले भने संसद विघटन गर्ने निर्णय असंवैधानिक भएको भन्दै सर्वोच्च अदालत जाने बताएका छन्।
