नयाँदिल्ली- सन् २०१३ देखि २०२२ सम्म भारतमा अति गर्मी (हिट वेभ)का कारण १० हजारले ज्यान गुमाएको तथ्यांक भारत सरकारले सार्वजनिक गरेको छ।
संसदको तल्लो सदन लोकसभामा केन्द्र सरकारका पृथ्वी विज्ञान राज्यमन्त्री जितेन्द्र सिंहले उक्त तथ्यांक प्रस्तुत गरेका हुन्। मन्त्री सिंहका अनुसार उक्त तथ्यांक गृह मन्त्रालयमातहतको राष्ट्रिय अपराध रेकर्ड ब्युरो (एनसीआरबी)ले संकलन गरेको हो।
तथ्यांकअनुसार ९ वर्षमा आन्ध्र प्रदेश, उत्तर प्रदेश, तेलंगना, पञ्जाब र बिहारमा हिटवेभका कारण सबैभन्दा बढी मृत्यु भएको छ। कुल १० हजार ६१७ मृत्युमध्ये आन्ध्रमा २ हजार २०३, उत्तर प्रदेशमा १ हजार ४८५, तेलंगनामा १ हजार १७२, पञ्जाबमा १ हजार ३० र बिहारमा ९३८ जनाले हिटवेभबाट ज्यान गुमाएका छन्।
केन्द्र शासित प्रदेशहरू मध्ये दिल्ली र जम्मु-कश्मीरमा १८ जनाले ज्यान गुमाएका छन्।
सन् २०१४ देखि २०२४ का २१९ गर्मी दिनहरूमा उत्तर प्रदेशमा आन्ध्रको तुलनामा हिटवेभका दिनहरू बढी थिए। तर, त्यसबाट मृत्यु हुनेको संख्या आन्ध्रमा बढी देखिएको छ।
त्यस अवधिमा गर्मीले ५० डिग्री सेल्सियसको रेकर्ड पार गरेको थियो, जुन ८० वर्षयताकै सर्वाधिक थियो। उत्तर र मध्य भारतका धेरै क्षेत्रमा लामो समय गर्मी महशुस भएको थियो।