कैलाली- काठमाडौंबाट धनगढी आएको श्री एयरलाइन्सको जहाज ल्यान्ड गर्ने क्रममा अगाडिको एउटा चक्का फुस्केको छ।
सोमबार साँझ काठमाडौंबाट धनगढी आएको जहाज ल्यान्ड गरेर पार्किङतर्फ मोड्ने बेलामा अगाडिको एउटा चक्का खुस्केर झाडीमा पुगेको थियो।
चक्का फुस्केको चाल पाएपछि एयरलाइन्सका कर्मचारी, प्रहरी र एयरपोर्ट कर्मचारी मिलेर खोजी गर्दा झाडीमा चक्का फेला पारेको हो।
यसबारेमा धनगढी एयरपोर्टका प्रमुख गणेशबहादुर सिंहले आफूलाई जानकारी नभएको प्रतिक्रिया दिए। उनले जहाज टेक्निकल फल्ट भएको भन्ने मौखिक जानकारी मात्रै पाएको बताए।
एयरपोर्टको सुरक्षाको जिम्मेवारी लिएको एयरपोर्ट सुरक्षाकर्मीले समेत जहाजको चक्का फुस्किएको बारे अनभिज्ञता प्रकट गर्दै आफूलाई जानकारी नै नभएको बताए। तर, स्रोतले दिएको जानकारीअनुसार सुरक्षाकर्मीसहितको टोलीले जहाजको चक्का खोजी गरी फेला पारेको बताएको छ।
श्री एयरलान्सका धनगढी प्रमुख गजेन्द्र शाहीले एएनएच २२७ उडान नम्बरको जहाजमा ल्यान्ड गरिसकेपछि टेक्निकल समस्या आएको बताए। उनले काठमाडौंबाट टेक्निकल टिम आउँदै गरेको बताउँदै अहिले ग्राउन्डेड जहाज मर्मतपछि मात्रै सञ्चालन आउने बताए।
चक्का फुस्किएकोबारे उनले सहमति जनाउँदै अहिलेलाई टेक्निकल समस्या मात्रै भएको बुझिदिन आग्रह गरे। तर, नेपाली हेडलाइनलाई भने जहाजमा काठमाडौंबाट धनगढी आएका एकजना यात्रुले आफ्नो नाम सार्वजनिक नगरिदिन आग्रह गर्दै चक्का फुस्किएको बारे बताएका थिए।