नेदरल्यान्ड्सको ‘द हेग’स्थित अन्तर्राष्ट्रिय फौजदारी अदालतमा रुसी राष्ट्रपति भ्लादिमिर पुटिनविरुद्ध युद्ध अपराधमा अनुसन्धान शुरु भएको छ।
अदालतका प्रमुख अभियोजक करिम खानले त्यसबारे जानकारी दिएका ह्न। ‘युक्रेनको परिस्थितिको शुरुवाती जाँचमा त्यो अन्तर्राष्ट्रिय फौजदारी अदालतको न्यायिक क्षेत्रमा अपराध भएको पाइएको छ,’ खानले भने, ‘र, त्यसबारे अनुसन्धान गर्न दिइएको निवेदन स्वीकार गरेका छौँ।’
बेलायतसहितका ३८ मुलुकले पुटिनविरुद्ध युद्ध अपराधमा अनुसन्धान थाल्न उक्त अदालतमा निवेदन दर्ता गरेका छन्। र, अभियोजकहरूले त्यसमाथि अनुसन्धान शुरु गरेका हुन्।
यसैबीच, रुसको आक्रमणका कारण युक्रेनका धेरै नागरिकको गैरन्यायिक हत्या भएको संयुक्त राष्ट्रसंघले जनाएको छ। तीमध्ये अधिकांशको बमबारीमा परी मृत्यु भएको छ।
हालसम्म आफ्ना दुईहजार निहत्था नागरिकको मृत्यु भइसकेको युक्रेनले जनाएको छ। युक्रेनका खार्किभ, खेरसान र मारियुपोललगायत ठूला शहरमा रुसको बमबारी जारी छ।
