सरकारले गाँजालाई औषधिमा प्रयोग गर्न दिनेगरी कानून निर्माणको तयारी थालेको छ। गृह मन्त्रालयले ‘गाँजा तथा गाँजाजन्य पदार्थ (नियमन) विधेयक, २०७८’ तयार पारेको हो।
मन्त्रालयले विधेयक तयार पारेर १० फागुनमा गृहमन्त्री बालकृष्ण खाणले मन्त्रीस्तरीय निर्णय गरी सैद्धान्तिक सहमतिका लागि मन्त्रिपरिषद्मा पठाइएको छ। मन्त्रालयको लागू औषध नियन्त्रण शाखा प्रमुख गोकर्णप्रसाद उपाध्यायका अनुसार विधेयकमा गाँजाको उत्पादन, संकलन, बिक्री वितरण र निकासी कसरी गर्ने भन्ने विषयमा समेटिएको छ।
उक्त विधेयक संघीय संसदबाट पारित भएपछि ‘लागू औषध नियन्त्रण ऐन, २०३३’ ले गाँजा प्रयोगमा पूर्ण रूपमा लगाएको बन्देज खुल्नेछ।
मन्त्रालयले केही दिनअघि सार्वजनिक गरेको गृह प्रशासन सुधार कार्ययोजनामा ‘गाँजाको औषधीय प्रयोगका लागि कार्यविधि तय गर्ने उल्लेख थियो। मन्त्रालयका अनुसार काठमाडौं विश्वविद्यालयले गाँजाको अनुसन्धान गर्न तथा थुप्रै संघसंस्था र फर्महरूले गाँजाको खेतीका लागि गृह प्रशासनसँग अनुमति मागिरहेका छन्।