विश्व स्वास्थ्य संगठन (डब्लूएचओ)ले कोरोना भाइरसको अर्को भेरियन्ट आउन सक्ने चेतावनी जारी गरेको छ।

‘ओमिक्रोन कोरोनाको अन्तिम भेरियन्ट होइन,’ डब्लूएचओले भनेको छ, ‘थप अरू भेरियन्ट पनि आउन सक्ने अधिक सम्भावना छ।’

आफ्नो आधिकारिक सामाजिक सञ्जाल मञ्चको सवाल–सवाल सत्रमा डब्लूएचओले यस्तो चेतावनी दिएको हो। उक्त सत्रमा सहभागीहरूको प्रश्नको जवाफ दिँदै डब्लूएचओको कोभिड–१९ प्राविधिक टोलीकी मारिया वान केरखोभले संगठनले ओमिक्रोन भेरियन्टलाई चार भिन्न रूपमा नजर राखिरहेको बताइन्।

‘हामी यस भाइरसको बारेमा धेरै कुरा जान्दछौँ। प्रष्ट रूपमा भन्नुपर्दा भाइरसको यो स्वरूप वाइल्ड कार्ड हो। यो भाइरसले आफ्नो स्वरूप बदलिरहन्छ। र, फेरि अर्को स्वरूपमा देखिन सक्ने सम्भावना अधिक छ,’ उनले भनिन्।

ओमिक्रोन कोरोनाको पछिल्लो चिन्ताजनक स्वरूप भएको उनले बताइन्। तथापि, त्यही नै अन्तिम चिन्ताजनक स्वरूप नभएको प्रष्ट्याइन्। ‘त्यसैले एक पटक अझै खोपको दायरा बढाउनु आवश्यक छ। र, भाइरस प्रसार रोकथामका उपायहरूको पालना सुनिश्चित गर्नु आवश्यक छ,’ उनले भनिन्।