एजेन्सी– हलिउड अभिनेता लान्स रेडिकको निधन भएको छ । रेडिकको ६० वर्षको उमेरमा शुक्रबार बिहान निधन भएको हो । उनको निधनको कारण भने हालसम्म खुल्न सकेको छैन ।
निधनको कारण भने अहिलेसम्म स्पष्ट नभए पनि उनको निधन प्राकृतिक भएको अन्तर्राष्ट्रिय सञ्चार माध्यमले जनाएका छन् । सुरुवाती केही वर्षहरूमा एपिसोडिक प्रस्तुती दिएपछि रेडिकले सन् २००० मा जेल ड्रामा शृंखला ‘ओजमा’ मा आफ्नो पहिलो मुख्य भूमिका पाए जहाँ उनले एक गुप्त अफिसर भूमिका निभाएका थिए ।
त्यसपछि उनी सन् २००२ मा क्राइम ड्रामा सिरिज ‘द वायर’ मा पुलिस लेफ्टिनेन्टको भूमिकामा थिए । रेडिकले सन् २००८ देखि सन् २०१३ सम्म विज्ञान कथा श्रृंखला ‘फ्रिन्ज’ मा पनि अभिनय गरेका थिए । त्यसको लागि दुई वटा पनि पुरस्कारका लागि मनोनित भएका थिए । रेडिकले सन् २०१४ देखि सन् २०२१ सम्मको प्रहरी शृङ्खला ‘बोस’ मा डेपुटी चीफ अफिसरको भूमिकामा काम गरेका थिए । जुन उनको करियरको उत्कृष्ट भूमिकामध्ये एक थियो ।
सन् २०१४ मा रेडिकले एक्शन–थ्रिलर जोन विकमा अभिनय गरेका थिए । रेडिक नेटफ्लिक्सको ‘रेसिडेन्ट इभिल’ र अमेजनको ‘द लिजेन्ड अफ भोक्स मेशिना’ को पनि एक हिस्सा थिए । यसबाहेक, रेडिकले भ्वाइसओभर कलाकारको रूपमा काम गरेका थिए ।
