काठमाडौँ – भारतीय चर्चित अभिनेताद्वय अमिताभ बच्चन र धर्मेन्द्रको घरमा बम उडाउने धम्की आएको छ ।
भारतीय सञ्चार माध्यमका अनुसार भारतको महाराष्ट्रको नागपुर प्रहरीलाई एक व्यक्तिले फोनबाट मुम्बईका चर्चित व्यक्तिहरूको घरमा बम विस्फोट हुन सक्ने जानकारी दिएको छ ।
सूचिमा चर्चित अभिनेताद्वय अमिताभ र धर्मेन्द्र समावेश छन् । त्यस्तै व्यापारी मुकेश अम्बानीको नाम पनि समावेश गरेको छ ।
उक्त फोन आएपछि प्रहरीले तत्काल कारबाही सुरु गरेको छ । २५ जना हतियारधारी आतंकवादी मुम्बई पुगेको र यससँगै व्यापारी मुकेश, धर्मेन्द्र र अमिताभ बच्चनको घर बाहिर बम राखिएको फोन गर्ने व्यक्तिले बताए ।
लगतै प्रहरीले बम डिस्पोजल टोलीसहित सबै ठाउँमा खोजी गरेको थियो । सरकारले अमिताभ, धर्मेन्द्र र मुकेशको सुरक्षामा ध्यान दिने बताइएको छ । अहिले कसैको घरमा बम नभेटिएको र सबै ठीक भएको समाचारमा उल्लेख गरिएको छ ।
